Ṭhazual Awards inbuatsaihna a kal mek

Music awards sem chhuah thar tur, Ṭhazual Awards chu buaipui chhoh mek a ni a, May thla hi chuan sem hman tum a ni. Category pasarih siam phawt a ni a, kum danga chhunzawm zel tura ruahmanin, category pawh hi pun leh zel tura ruahman a ni.

Male Artist, Gospel huang bik hi thlir chiang ta ila. Ṭhazual Awards, Rin Rin Best Male Artist (Gospel)-ah hian TBC Zaithanpuia sak 'Fak zel che ka duh', Amtea hla 'Ka nghing lovang', Lalhmingliana Chhangte hla 'Ka fak zel ang', Chris MS Dawngkima hla 'Kawng min hawn ru' leh PBK Liankhuma hla 'Hmuh theih loh ro hlu Isua' te a awm a ni.

TBC Zaithanpuia hian kum 2014 chhung khan ama single pathum leh Bethsy nena an sak te nen music video pali a tichhuak a, hengte hi Ṭhazual chart-a hlawhtling tak tak vek an ni. A tihchhuahte hi 'Isu Ka hmangaih che', 'Fak zel che ka duh', 'Lo kir rawh,' tih leh Bethsy nena an sak 'Isua ka ṭhian a ni' tihte a ni. 'Fak zel che ka duh' tih hla hi chart-ah ṭum li (4) a lang a, a thlen san berah pathumna a hauh.

Amtea hian music video a la ngah lo a, nikum chhung khan tuna nominate, 'Ka nghing lovang' tih chauh hi a tichhuak a, nikum khan ṭum khat Ṭhazualah hian a lang hman a, vawi khat a lang. Lalhmingliana Chhangte, Hmingtea tia kan hriatlar hian nikum chhung khan music video pahnih a tichhuak a, pakhat chu Sailo Nutei nena an sak 'Kir leh rawh' tih kha a ni. Tuna a lanna 'Ka fak zel ang' tih hla hi ṭum nga nikum chhung khan a lang hman a, a sang berah pathumna a thleng.

PBK Liankhuma music video 'Hmuh theih loh ro hlu' hi chart-ah ṭum nga a lang a, 10-na ṭum khat, pariatna um thum leh parukna ṭum khatte a hauh. Music video a tichhuak hnem lo hrim hrim.

Rin Rin Best Male Artist (Gospel)-a nominate zinga chart-a dinhmun chang ṭha ber chu Chris MS Dawngkima hla 'Kawng min hawn ru' tih hi a ni. Top 10-ah ṭum 12 zet a lang a, pakhatna ṭum hnih langin, pahnihna ṭum hnih, pathumna ṭum khat a luah a, a bakah palina, panga, parukna leh pariatna te a hauh bawk.