Fashion Fiesta
Mizoram University chuan kum tina a tih ṭhin danin zirlaite inelna thianghlim tak mai a buatsaih a. Infiamna mai ni lo, an zirlaia ṭanpuitu ni pahfawmin activities hrang hrang a leng a ni ringawt mai. Chutiangin ṭhalaite fashion lama inelna felfai tak a duansak ziah bawk. Kum li kum nga dawn chu a ni ve ta, Mizoram University hnuaia Department hrang hrang ten he inelnaah hian an intihsiak ṭhin. Department hrang hrangte chauh lo pawh College hrang hrang pawh he huna tel tur hian sawm leh tel theih a nih avangin College lian zinga mi Hrangbana College pawh vawi duai lo lo tel vein, pakhatna vawi 3 emaw dawn lai an lo zuk ni tawh. He Runway Show Down-an tih mai, ṭhalaite, zirlai mai ni lova hma kan sawnna tura nasa taka chona min petu ni ṭhin hi ka lo zuk chhim ve nual tawh a. Designers Fashion Show ang ni lo mah se a changtlungin, a telte leh an Show hi a felfai em em mai a. University zirlaite an fakawmin he Runway Show Down atana an inpuahchahna hi a pui thei hle. Department a zirin an ngaih pawimawh dan lah a inanglo na ngiang mai. Thenkhat, a hminga tel ve mai mai an awm laiin ṭhenkhat theihtawp chhuaha sum leh pai insen piah lama pawnlam mi, mithiam zawkte ruaia he Show tihlu zual em emtute an kat nawk bawk. Professional Choreographer-te ruaiin Department chhunga mipa leh hmeichhia nalh leh zei deuhte thlan chhuah a ni ṭhin. Professional Model-te anga sang, sei zen thlirh thlerh ni lo mah se heng Department hminga tel chin tawhte hi an nalhin an zei em em ṭhin a ni.
Mak dangdai tak mai chu an zei thei lutuk hi! Professional model-lam aiin catwalk (Model kal dan) ang chiah na na na chuan an zei zawk tlat ṭhin hi Show tihmuhnawmtu ber a ni ṭhin. Hei ai maha Show tihmuhnawm lehzualtu chu rawlthar, kan tlangval lam modelling lam tuipui awm lo fu fu mai nalh taka inchei a, zei tak maia an kal vel hmuh chu Zoram Fashion Show-ah mens wear-te kan hmuh tam ve loh avangin a dangdaiin phai lam thleng pawha promote chakawm tak tak tlangval hleitling fe fe an kat nuk ṭhin. Khawi modelling agency vel chuan rawn thlithlai ve se chuan, zirlai ṭhenkhat an line kalsana modelling lama kal ta an awm fur ang le.
He Runway Show Down kalhmang tlangpuiah chuan kum tinin a Organizing Committee-lamin theme buatsaihin a tel tur department-te khan he theme hmang hian inelna an nei ta ṭhin a ni. Fashion Show pangngai ang loin Choreography ngaih pawimawh a ni a. A participate-te inelna pui ber pakhat pawh a ni a, a show tihmuhnawmtu pawh a ni reng a ni. Model kal deuh tlung tlung a nih loh avangin mit a tlai em em ṭhin. Chutah theme mil khan an thawmhnaw lam an buatsaih a, a hmei a pain an inchei ta ṭhin a, designing lamah pawh ṭha tak tak hmuh tur an awm thin. Department ṭhenkhat chuan an hawh a, a ṭhen erawh chuan anmahni ngeia an ṭhuite an rawn inbel ṭhin a. Designing institute ṭhenkhat ai pawhin an thiam emaw ni chu aw? tih tur khawpin an thawmhnaw a changtlung ṭhin. Chutah music-in mark a pu leh a, model-te kal mil tur music thlan fimkhur a ngai hle ṭhin. Dangdai satliah ni lovin an theme mil an thlan a ngai tlat. Chutah Best Female leh male Model thlan a ni ṭhin a. Hemi bik hi chu a tel zawng zawngte aṭanga a nalh chu thu hran, a zei leh hmelṭha berte thlan chhuah a ni ṭhin. Heng category hrang hranga inelin, pawnlam mi Zoramin designer kan neih ṭhat te sawmin heng mithiamte endikna hnuaiah hian an inel ta ṭhin a ni.
Kum dang ang bawkin kuminah pawh theme thlan chhuah niin “As you like it” leh decades hrang hrang 60’s, 70’s, 80’s hunlaia incheinate hmanga inelna neihpui an ni leh a. Department hrang hrangte inpuahchahna a ṭha hle. Kumin Vibrio Runway Show Down zet chu kum dang aiin inpuahchahna a nasa lehzual a, department pariat inelin heng department-te hian theme hrang hrang anmahni duhzawng thlangin an theme mila incheiin an intihsiak a. Endiktu lamah Designer Ruata (Veruata) tuna Vakiria Institute of Fashion Technology-a instructor ni lai mek leh Mart Chawngthu NIFT Kolkata chhuak leh Dr. H. Lalzuithangi, lecturer Govt. Hrangbana College te an ni. Heng department inelte zingah hian English Department chuan Year 3000 hmangin lawmman pakhatna an la a, heng bakah hian Management Department lam chuan Jazzed Up Denim theme-ah hmangin Jeans kekawr leh Jacket an rawn inbel a ni. He Show tihmuhnawmtute zinga pakhat ni turin 60’s chhoa Movie lar em em mai Grease Character-hmangin Show hmuhnawm tak tak, mit titlai em em turte kan hmu a, anni hian lawmman pahnihna lain abak zawngin consolation prize an la a, a hmuhnawmin mit an titlai tak zet a ni. Heng bakah hian Best Male Model-ah Ebenezar Lalduhsaka, Psychology Department thlan niin, Best Female Model-ah Lalrinthari Zadeng, Mass Comm. Department chu thlan a ni a. Heng bakah hian Best Choreography-ah William, Mass Comm. Department leh Eveon touch Best hair style-ah RCA Mizo department te thlan an ni bawk. He show hmuhnawm tak hi zawng chhang chi niin zirlai te intihhlimna tha tak ni pawhin a lang, chin fo atan a ṭha ka ti hle.
Tluangpuii Hmar
Instructress
Vakiria Institute of Fashion Technology