Thawnthu ṭha ber C. Lalbiaknunga ziah 'Hruizen sen'
CYMA leh AIE Construction buatsaih ‘Thawnthu Inphuahsiak’ result chu Thawhlehni zan khan Central YMA Hall, Tuikhuahtlangah puan a ni a; C. Lalbiaknunga, Durtlang North thawnthu ziah 'Hruizen sen' chu pakhatna a ni.
Thawhthu Inphuahsiakah hian thawnthu 543 a lut a, heta ṭanga thawnthu ṭha 10 thlanchhuah chu Central YMA chuan a bua siamin a hmingah ‘Tungchaw’ an vuah. Khuallian R. Lalzirliana, Art & Culture minister chuan a tlangzarh. Lehkhabu hi phek 440 zeta chhah a ni a, lehkhabu dawr hrang hrangah Rs 300 a lei theih a ni ang.
Lawmman dawngtute
Pakhatna C. Lalbiaknunga hian Rs 70,000 a dawng a, Lalhruaitluanga, Salem Vengin a thawnthu ziah 'Lalbiaknia' chu pahnihna nihpuiin Rs 50,000 a dawng. Pathumna Lalrinkima Bawihtlung, Dinthar, West Phailengin a thuziak 'Ruatbala' chu pathumna nihpuiin Rs 30,000 a dawng bawk.
Lawmman sem zan hian Art & Culture minister R. Lalzirliana chu khuallian a ni a, thuziak lama Central YMA hmalakna chu a fak. Zemabawk Branch aṭangin thawnthu 16 a lut a, thawnthu thehlut tam ber Branch hian Rs 5,000 an dawng.
Pakhatna aṭanga pathumna bakah hian mi pasarih R. Lalbiakfela (Salem Veng), R. Lalhmunsanga (Chhinga Veng), Sangzuala Pachuau (Mission Veng), R. Nelson (Mission Veng), T. Lalchhuangliana (Upper Republic), P.C. Lalrinhlua (Khawhai) leh H.D. Lalremsiama (Sesawng) hnenah consolation prize Rs 3,000 ṭheuh pek an ni.
An ziak ṭha tlang
Thawnthu Inphuahsiak hi Mizo ziak mi lar Vanneihtluanga, Chanmari, P.L. Liandinga, Khatla South leh C. Lalnunchanga, Bawngkawn South ten uluk takin an endik.
Lengzem editor Vannneihtluanga chuan, "A pumpui thuin a sang ka ti khawp mai. Ka beisei aiin a ṭha. Social media lama Mizo ṭawng duhdah taka hmang ang chi kha an tel mang lo. Mizo ṭawngin ṭha takin an sawi tum an sawi thei vekin ka hria a, thawnthu thehluh zinga 70% te kha chu theihtawp chhuahin an rawn ziakin ka hria," tiin Vanglaini a hrilh.
Mizo ṭawnga Sherlock Holmes leh Arabian Nights lettu PL Liandinga chuan, "A ṭha hlawm khawp mai. A ṭha vek ka tihna erawh a ni lo. A ṭha a tam a, a ṭha lo pawh a awm. Thawnthu inziahsiaka kha ti zat lut hrim hrim kha a ropui. Lehkha chhiar kan la bansan lo tih a lang a, ka lawm hle," tiin thawnthu ziah a endik aṭanga lawmna a hmuh thu a sawi.
Pasalṭhate ni hnuhnung (2006) leh Kawlkil piah Lamtluang (2015) hmanga book of the year dawng tawhtu C. Lalnunchanga (Taitea) chuan, "Mizo pasalṭha behchhana thawnthu ziak ho an fimkhur a ṭul, hman lai Mizo nun an hriat lohzia a lang. Pasalṭha nun dan an hre thiam lo a, 'historical section' a dah tlak a ni lo. Chutih rualin thawnthu hrim hrim erawh a ṭha tlang a, a lungawi thlakin ka hria," tiin Vanglaini a hrilh a, thawnthu ziah hmaa kan thuziah hriat chian lehzual a ṭul zia a sawi lang.
A chhehvel
CYMA buatsaih inelnaah hian thawnthu 543 a lut a, mipa kut chhuak 426 awmin hmeichhe thu ziak 117 a awm. Thawhthu ziaktu naupang ber hi kum sarih mi a ni a, a upa ber hi kum 97 niin an inthlauhna hi kum 90 zet a tling.
Thawnthu thehluttute kum chawhrual hi kum 34 a ni a, khawpui Branch aṭangin thawnthu 302 a lut. Mizoram pawn aṭangin thawnthu pali a lut a, Tripura aṭangin pahnih lutin Manipur leh Myanmar aṭangin pakhat ve ve a lut bawk. CYMA lam chuan thuziak lama tui mi ṭhahnem tak an awm hi lawmawm an ti hle.
Lawmman
Pos Hming Veng/Khua Thawnthu Hming
1-na C. Lalbiaknunga Durtlang North Hruizen sen
2-na Lalhruaitluanga Salem Veng Lalbiaknia
3-na Lalrinkima Bawihtlung Dinthar, West Phaileng Ruatbala
Top 10-a lang pha dang
Hming Veng/Khua Thawnthu Hming
R. Lalbiakfela Salem Veng Chhanchhuaktu
R. Lalhmunsanga Chhinga Veng Dâwmi
Sangzuala Pachuau Mission Veng Dawt mawi ber
R. Nelson Mission Veng Hawlhhah bâwk kha
T. Lalchhuangliana Upper Republic Hriat reng phu pasalṭhate
P.C. Lalrinhlua Khawhai Shalom Zothansangi
H.D. Lalremsiama Sesawng Tawnmang sulhnu