Billboard 200: A kar thumnaah 'Short n' Sweet' bawk

American singer, Sabrina Carpenter album thar, 'Short n' Sweet' chuan a kar thumna atan Billboard 200 album chart-ah No 1 a hauh chhunzawm. Kumina album chart-ah kar thum chhung No 1 ni thei album pahnihna a ni.

Kum 25 mi, Carpenter album hian kar liam ta chhungin US-ah equivalent album unit 117,000 neih belh lehin, album-a hla 12 te chuan on-demand official stream mtd 134.79 an nei a, album sale hi 15,000 a la nei tling bawk.

'Short n' Sweet' hi Carpenter studio album parukna niin, August 23, 2024-a a tlangzarh a ni a, tlangzarh karah hian No 1-ah a rawn lang nghal a ni. He album-a a hla te pawh hi Hot 100-a Top 50 ah an lang pha vek bawk a ni.

Post Malone 'F-1 Trillion' pawh No 2-ah a ding nghet a, equivalent album unit 72,000 a nei. Chappel Roan 'The Rise and Fall of a Midwest Princess' chuan equivalent album unit 57,000 neiin No 3-ah a awm a, Morgan Wallen pawh a awmna ngai, No 4-ah awm chhunzawm zelin equivalent album unit 52,000 a nei. Taylor Swift 'The Tortured Poets Department' pawh No 5-ah a la awm nghet zel.