Vawiinah Kimkima hla thar 'Ka Damlo'

Mizo zaithiamte zinga award an sem ṭhin ang zawng zawng hui kim vek tawh Kimkima chuan zanin tlai dar 5-ah hian a YouTube channel-ah hla thar a tichhuak dawn.

Kimkima hla thar tur hi 'Ka Damlo' tih a ni dawn a, a hla pa­kuana tur a ni ang.

"He khawvela thil awm zawng zawng hi, kan thil duh zawng leh kan hmangaih zawng zawngte hi engtik niah emaw chuan kan lak aṭanga lak hran tur niin ral leh mai tur vek an ni a, keimahni ngei pawh hi boral leh vek tur kan ni. Pathianin he hun min pek hi hlut leh hlim takin I hmang zel ang u," tiin Kimkima chuan a hla thar tur chungchang hi a sawi a, englam hawi zawng nge a nih dawn chiang takin sawi lang lo mah se kan hun neih ang kan hlut a ṭulzia leh he khawvela thil awmte an la ral tur zia tarlanna lam hla tur a nih hmel a, a hla thupui aṭang hian hetiang lamah engtin nge a kaihluh tih chu vawiin tlaiah kan hre thei dawn a ni.

Kimkima hian Ṭha­zual, Lelte, Moonlight leh Vulmawi award-te a dawng vek tawh a, a hlate hian hlut a hlawh ṭhin a hla eng emaw zat chu mi maktaduai chuangin  YouTube-ah an thlir tawh a ni. 'I zun ngaih lunglen' lyric video phei kha chu mi maktaduai 7.2 chuangin an thlir tawh a, Mizo hlaah chuan YouTube-a viewer ngah ber a ni hial awm e. A music video pangngai pawh kha mi maktaduai 3.5-in an thlir tawh bawk. A hla thar tur pawh hi a nalh hle turah beisei ang.