Bihar-ah Covid-19 vaccine a thlawnin sem dawn

Inthlan an neih dawna an lo tiam tawh angin Bihar-a Nitish Kumar kaihhruai sorkar chuan Thawhlehni khan an state chhungah coronavirus vaccine a thlawna sem a remti.

Thawhlehni khan Nitish Kumar kaihhruai sorkar hian sorkarna an chelh thar leh hnua cabinet meeting hmasa ber an nei a, hetah hian Covid-19 vaccine a thlawna sem hi an remti nghal. State assembly inthlanna neih a nih lai khan union finance minister Nirmala Sitharaman chuan Bihar chu Covid vaccine a thlawna pek an ni dawn tih hi a sawi a ni.

Chief minister Nitish Kumar chuan health department chu hemi atana hma la  tur hian a hriattir nghal niin report ṭhenkhat chuan an tarlang.

Deputy CM Tarkishore Prasad chuan BJP leh NDA chuan thu an lo tiam tawh angin an state chhungah chuan coronavirus damdawi chu a thlawnin an sem dawn tih leh Bihar chakna lian ber chu human resource a nih avangin state mipuite chu hripui leng laka humhim an duh tih a sawi. Tarkishore Prasad chuan vaccine chu pawm a nih a, lei theiha zawrh chhuah a nih velah kan sem nghal dawn a ni, a ti.