Asia-ah hausa an pung
Mi hausa tawntaw tam leh tam loh hi ram ṭhan chak leh ṭhan chak loh tilangtu pawimawh tak a ni a, hetiang kawngah chuan Asia khawmualpui hian hma a hruai mek a, khawmualpui dang aiin Asia-a mi hausate hausakna hi a pung nasa zual a, hausa tawntaw pawh an pung chak hle.
World Wealth Report-in a tarlan dan chuan North America, Europe leh khawvel khawmualpui dangte aiin Asia khawmualpuia mi hausa tawntawte hausakna a pung chak zawk a ni. Asia-a millionaire te hausakna, an thil neih hlut lam hi nikum, kum 2015 ai khan za zelah 9.9 zetin a pung. An hausakna tipung nasatu lian tak tak chu financial service te, high tech te, health care industry te a ni.
Mi hausate hausakna belhkhawm tam lamah UK hi pangana a ni pha a, mahse heng mi hausate hausakna punna hi a tlem hle a, za zela 5.7 a ni a, khawvel pum chawhrual chu 7.2-a pung ang a ni. UK-ah hian millionaire hi 553,000 lai an awm a, heng mite hausakna belhkhawm hi £ trillion 1.3 (tluklehdingawn 1300) vel a ni. Europe pumpuia hausate hausakna hi 4.8% chauhin a pung a, Spain leh Netherlands-a hausate sum pung tam deuh.
Nikum khan mi hausate sum neih hlut lam hi £ trillion 40 (tld 40,000) zet a ni a, kum 30 kalta millionaire-te sum neih zawng zawng aiin a let li zetin a tam tawh zawk. Kum 2025 khi chuan mi hausate sum neih tam lam hi £ trillion 67 tling tawh tura ngaih a ni.
Asia khawmualpuia mi hausate sum neih zawng zawng belhkhawm hi £ trillion 11.7 zet a ni a, kum 2006 kha chuan £ trillion 5.6 a ni; North America pawh Asia hian a khum tawh a, North America-a mi hausate sum neih hi £ trillion 10.8 a ni.
Millionaire hrim hrim tam lamah pawh Asia hian North America a khum tawh a ni. US ikah millionaire hi maktaduai 4.5 lai an awm a, Asia-ah la tam zawkin, millionaire maktaduai 5.1 an awm. Asia-ah pawn Japan-ah millionaire an tam ber a, maktaduai 2.7 an awm a, a dawt chu China niin, millionaire hi mi maktaduai 1 lai an awm.
ν Asia-a millionaire-te sum neih belhkhawm khawvel pumah a tam ber
ν Millionaire hrim hrim tam lamah US (N. America) dawtah Asia a awm
ν Europe leh Latin America-a millionaire-te sum neih belhkhawm a pung tlem hle
ν Kum 30 kalta aia millionaire-te sum neih tam lam hi a let liin a pung
ν Asia-ah Japan ramah millionaire an tam ber a, China-in a dawt