Thazual Awards Zai lamah an thiam dan a inchen hle

Langsar leh hming chher tawh a awm theih a, amaherawhchu zaithiam lama teh e≠rawh chuan Ṭh≠azual Awards sem tura nominee-te hi an ṭha tlangpui vek. A bikin Best Artist leh New Artist bikte hi thlir bik ta ila.

Samsung 3:16 Best Female Artist Lengzem chhung≠ah hian Feli Fanai, Lawmi Khiangte, Essy, DJ Lalvenhimi leh Christy Zaithanchhungi te an awm a, an vai hian an ṭha tlang ṭhe ṭhaw hlawm hle. Feli Fanai hla tunhnaia kan ngaihthlak nasat chu 'Ti ve mai la' tih a ni a, May thlaa a siam chauh kha a ni a, pakhatna pawh a hauh nghe nghe a nih kha. Lawmi Khiangte hi chart-a an chet ṭhat dan aṭanga teh chuan a chhuanawm a, mahse chart-a pakhatna luah ngun aṭang ringawta thlan tur a ni dawn lo thung. A hla 'E o...' khan a zawnin vawi li zet mai pakhatna a luah a ni. Essy thung hian 'Inchhuang mai lo la' hla hmangin pakhatna a lo hauh tawh a, chumi hnuah hla hit ropui tak 'Hey' a nei leh bawk. 'A dam ve tur' tih te, 'Chhingkhual D' tihte hla ṭha tak tak a neih bakah Christy Zaithanchhungi hian 'Tleitiri' tih pawh a hlawhtlinpui bawk.

Mizo Tea Best Female Artist Gospel-a langte hi tunlaia Gospel huang chhunga kan neih ṭhat ber ber an ni. Bethsy hi chart-ah pawh ropuina lo chang fo tawh a ni a, 'Min hmangaih si a' tih hla, a hla neih thar berte zinga mi hian chart-ah pawh pakhatna vawi hnih ngawt a luah tawh a, trio-a an sak 'Mamawh chhanna' pawh a hlawhtling turu hle. Chutiang bawkin Pensy-i pawh kan neih ṭhat ber zinga mi a ni a, Lengzem lamah pawh pakhatna a hauh a nih kha. Mizo Idol aṭanga rawn invawrh chhuak Baby Malsawmtluangi pawh April 11 khan 'Ka hlau lovang' hla hmangin pakhatna a ni thei. Mizo Idol aṭanga kan hriat chhoh tho bawk, Grace Lalchhanhimi hi a turu bawk. 'Ka thinlung chelhtu', 'Rorelna Ni' tihte a lo hlawhtling tawh a, 'Aw ropui ber' pawh a hlawhtling hle bawk.

Vogue Best New Artist Gospel-ah hian Omomi Khiangte, Esther Khiangte, Vanlalpari, Lalchhanhimi Palian leh Zorinsanga Sailo te kan hmu. Mizo Idol 2013 aṭanga kan hriat, Omomi Khiangte hian a pa hla phuah 'Kraws Kawng' a rawn thlawh a, a hit hle a, March thla thleng khan Ṭhazual top 10-ah a lang. Estheri Khiangte pawh a zai kan ngaihthla a, a thiam a ni. February thla thleng khan a hla 'I tan ka awm' tih chu Ṭhazual top 10-ah a lang ngar ngar a, tunah hian 'Hmangaihna hlu' tih hla chu top 10-ah kan hmu leh mek bawk.

Synod Choir aṭanga kan hmelhriat Vanlalpari hian nikum aṭang khan solo music video a nei ṭan a, a ropuina kan hmu nghal. 'I ropui nan' tih hla chu nikum October aṭanga kumin January thleng khan chart-ah a lang a, pakhatna pawh a ni nghe nghe. Lalchhanhimi Palian pawh nikum aṭangin Zoramin a thiamzia kan hria a, 'Nitin Isua' tih hla chu top 10-ah pawh a lang rei hle. Vogue Best New Artist Gospel-a mipa lang awm chhun hi Zorinsanga Sailo a ni a, Ramhlun North tlangval a ni. 'Ka hmangaih hma pawhin' tih hla a hlawhtlinpui tawh a, hman deuh lawk khan music video thar 'Chhandamtu ngilnei chuan' tih kha a tichhuak a ni.