Hiddleston-a'n Swift a thlawp zel Kim & Kanye vs Swift

Tunlai hian Taylor Swift leh Kim Kardashian West inkar a ṭha lo a, chanchinbu hrang hrangah chhuah ṭhin a ni. Hetiang boruak velah hian Tom Hiddleston chuan a bialnu Taylor Swift chu a thlawp tlat zel.

Loki lema chang ṭhin Hiddleston hian Swift chu a hmangaih em em a, a bialnu an sawiselna karah leh, beihna a tawh karah pawh a vuan tlatin a thlawp tlat zel dawn tih a sawi.

Kanye West leh Taylor Swift inkar khi rawn inṭanna chu kum 2009-a MTV Video Music Awards sem a nih aṭangin a chhui let theih. Hemi ṭum hian Swift hian Best Femal Video a dawng a, stage-a award dawng tura a chho chu Kanye West hian lo tibuaiin, mic a la a, Swift ai chuan Beyonce-i'n dawng se a ‚wm fe zawk tih a sawi a; hemi thu hi a hnuah sawi zui a hlawh hle.

Tichuan boruak a kal zel a, inkah fek fek a awm chho ṭan a, thawm neuh neuh a awm ve reng. Kumin Grammy-ah khan Taylor Swift hian Album of the Year a zawna a vawi hnih nan a dawng leh a, heta a thusawiah, tute emaw chuan a hlawhtlinna tihchhiat an tum a, an tihchhiat theih loh pawhin a hlawhtlinna hmanga hmingṭhat hlawh tum an awm niin a sawi.

Grammy sem lai chho vel, a hma lam hret aṭang tawhin Kanye West chuan hla a lo puah ve mek bawk a, a hla hi 'Famous' a ni a, February thla khan a tichhuak a ni. He hlaah hian West chuan Swift chu ṭawngkam bawlhhlawh tak tak hmanga a beih bakah, amah avanga lar leh hlawhtling niin a sawi.

'Famous' hla a chhuah veleh chuan Taylor Swift fan-te chuan Kanye West chu hmeichhia hrim hrim ngei chi niin an sawi a, hei bakah Swift thupuangtu pakhat chuan he hla chungchangah hian West hian Swift phalna pakhat mah a la lo niin a sawi. Hemi thu kal zelah West chuan Twitter-ah Swift hian a hriatpui a ni tih a puang chhuak a, a nupui, Kim K pawhin a hriatpui a ni a ti. Kim K hian GQ chanchinbu, July chhuakah hemi chungchang hi a sawi chhuak a, a nemngheh nan a pasal leh Swift inbiakna pawh a nei thlap tih a sawi. He a thusawi hi a dik ngei tih nemngheh nan Snapchat-ah telephone-a Swift leh West te inbe lai video hi a rawn dah chhuak ta a ni.

Swift chuan he video hi edit leh lak tawi a ni a ti a, Snapchat-ah hian video thui zawng turte bituk chin a awm avangin a ṭhen lai lai chauh lak chhuah a ni a ti. Swift hian Insta-ah, "Khawiah nge West-a'n 'That bitch' tiin ka ko dawn che a tihna laite kha a awm t‚k?" tia sawiin, amah a saksak ang tihte pawh a sawi a, mahse chutiang reng reng a awm lo tihte sawiin, West te nupa chu dawthmang, dawtheiah a puh a ni.