Stacy a rawn lang leh e

'Khawngaihna thing kraws' aṭangin a hneh a, tunah chuan 'Hnehna hla mawi' a sa thei ta. Stacy hian hla thar a peih leh ta a, a hla thar hi 'Hnehna hla mawi' a ni.

Tuikual KṬP-in album an siamah thiam leh nalh zet maiin 'Khawngaihna thing kraws' a sa a, single-in MDM library-ah dah a ni a, chart lamah pawh a che chhe lo hle. Stacy hian hemi hnua a music video hmasa ber tur chu a peihfel a, hei pawh hi beisei a sang hle.

Stacy hla thar 'Hnehna hla mawi' hi Samsung 3:16 presents Health & Fitness Challenge Show, Magnus Health Club leh Mamawii Health and Fitness Clinic ṭangkawpa Zonet chhuak ṭhinah hian a theme song-a hman tur a ni. Hla phuahtu hi LR Ruata niin, music composer hi Victor, Scavenger Project a ni. Videography hi Andrew Lalbiaknunga Ralte (ALAR) kutchhuak a ni a, wardrobe hi Hannah Khiangte niin, Jospeh Parlour chuan Hair & Make Up lam an tum thung.

He hla hi amah Stacy chuan a chhuang hle a, "A hla hi an phuah nalh khawp mai. A ṭhalai zek zawk khawp mai a, ṭhalaite duh leh ngainat chi niin ka hria," a ti. "A video-ah hian lam an awm dawn nghe nghe. Mission Veng KṬP-in hman kuma Faklam intihsiak an buatsaih ṭum a, Jubilee Band hla sak 'Tunge' hlaa rawn lam te, Bawngkawn KṬP Faklam member te pahnih, lam thiam em em mai Zuitei leh Ahriata mawi takin video ah hian a lam bawk. A hla hi sak a nuam a, a hot hle," a ti.

Stacy hian tunah hian album a buatsaih mek bawk a, mahse a album tur chungchang hi sawi chhuah tam a la duh lo. Hla eng emaw zat chu a siam tawh a, engtikah nge a tihchhuah ang tih a sawi thei rih lo a, hma a la mek.