Kickass Torrents hotupa an man Piracy site neitute an pau a khauh zel

Khawvela piracy site lian berte zinga mi, Kickass Torrents-a an hotupa chu Poland-ah man a ni a, piracy leh copyright bawhchhiat velah thubuai siamsak a ni ang.

Kickass-a an hotupa hi Ukraine mi niin, kum 30 mi Artem Vaulin a ni a, Ukraine-a Kharkiv khaw mi a ni. Vaulin Kickass Torrents neitupa nia ngaih a ni. Pirate Bay leh piracy site ṭhenkhatte man an nih a, thubuaite siamsak an nih hnuah Kickass hi khawvela piracy site lian bera ngaih a ni.

US Justice Department-in a tarlan danin Kickass Torrents hi khawvela website tlawh hlawh ber 69-na a ni. Movie leh TV serial film mai bakah music, video game leh eletronic media dangte torrent downloader leh direct hmanga a thlawna download theiha dahna a ni. Hetia man a nih hnu hian Kickass Torrent site chu offline nghal a ni.

KAT hi ṭawng 28-in a awm a, he website hlut lam hi USD mtd 54 vel zet nia chhut a ni. Adver≠tise≠≠≠ment aṭangin he site hian kum khat chhung≠in USD mtd 12.5 aṭanga mdt 22.3 inkar lalut ziah ang≠a ngaih a ni bawk. Ram hrang hrangah an block ṭhin avangin hmun hrang hrangah an insawn a, Bri≠tain, Ireland, Italy, Den≠≠mark, Belgium leh Ma≠lay≠sia-ah te an block mek.

Hetihlai hian piracy site lian hmasa leh lar hmasa, Mizo, internet hmang hmasate pawhin an chhawr em em ṭhin, Megaupload-a an hotupa, Kim Dotcom tia hriat lar chu New Zealand jail aṭangin bail-a chhuah a ni a, US chuan New Zealand hnenah hian a kut hlan turin a ngen a, mahse hei hi pending rih a ni. Kim Dotcom hian tun≠hnai khan Megaupload hi siam thar leh tumin thu a tiam niin an sawi nghe nghe. Megaupload neitupa hi kum 2012 khan an man a ni. US hnena hlan chhawn chungchang hi August thla hian ngaihtuah ṭhat leh a ni ang.

Pirate Bay pawh copyright chungchangah thubuai neiin, thiam loh chantir a ni a, tunah hian Sweden sorkar kutah a awm mek. An hotupa ber man mah se Pirate Bay hi a kal ngaiin a la kal reng thung a, amaherawhchu a hma ang erawh a ni pha tawh lo. Thuneitute chuan file inhlan≠chhawnna website hi an tihtawpsak (shut down) thei tih an sawi a, mahse midangin an kalpui zui a, a website kha an hawng thar leh zel a ni an ti.