Ṭhazual Awards Category pathuma mite

Ṭhazual Awards sem hun a hnai tawh a, tunkar hian sem a ni tawh dawn. Heta category pathuma mite bik hi thlir chiang dawn ila. Ṭhazual chart-a an lo lan tawh dan tlem tlem tarlang ila, tute nge an nih kan hre chiang lehzual ang.

LH Thanga Enterprise Best New Artist Lengzemah hian Josephine Lalawmpuii, Mampuii Thlauhthang, Zothana, Lawmkimi Chawnghlut leh F. Zomuanpuia te an lang. Josephine Lalawmpuii hian pakhatna chu la luah chiah lo mah se, 'Ka zawt a che' tih hla hmangin February thla khan kan hmu ṭan a, tunah hian 'I lo ni reng si nen' chart-ah a lang mek. Mampuii Thlauhthang pawh 'A pawi ngei' hla hmangin Ṭhazual chart-ah kumin kumtir lam khan kan hmu bawk. Zothana hi March thla aṭang khan 'Sam ang ka ṭhen ta e' tih nen a rawn lang ṭan bawk. Lawmkimi Chawnghlut hla 'Lenglerh' tih chu tunah hian panganaah a lang mek. F. Zomuanpuia hian top 10-a lang hla pahnih a nei a, kumin February thla chho vela kan hmuh 'Dont let me down' kha a hit hle a, tunah hian 'Min hnem la' tih nen a rawn lang mek.

One in Christ, Vohbik. Trio (Bethsy, Pensy, Temi Sailo), Kolkata Mizo Students leh stAge ft. Sangtei Khawlhring te chu MD&D Enterprise Best Duo/Group-a inel turte an ni. He category hi kumin aṭanga siam a ni. One in Christ hian nikum khan pakhatna an luah tawh a, kuminah 'Ni thar' hla hmangin a zawnin vawi thum ngawt pakhatnaah an awm bawk. Vohbik pawh album thar nen an rawn intuaithar a, an hla 'Jordan lui' chu pakhatnaah vawi hnih kan hmuh bawk kha. Bethsy, Pensy leh Temi Sailo te hla 'Mamawh chhanna' kha a hit hle a, pakhatnaah vawi hnih lai a awm. Kum 2015 March
aṭang khan Kolkata Mizo Students te music video 'Kan ding' kha kan hmu a, pahnihna hial a thleng a ni. Tunhnaia hlawhtling tak chu stAge ft. Sangtei Khawlhring hi a ni a, pakhatnaah a zawnin vawi li ngawt an awm bawk.

Kelvi International Best Music Video-ah Lawmi Khiangte 'E o...Kan hlimlai', Kolkata Mizo Students 'Kan ding (Zoram tan)', Manuna 'Ka lo kir tawh lo'ng', Feli Fanai 'Ti ve mai la' leh Zothana 'Sam ang ka ṭhen ta e' tihte an lang bawk. A mal malin thlur dawn ila tam tak sawi tur a awm a, a hmuhnawm hlawm. Tunlai khawvelah, music video siam an uluk tawh a, a ṭha thei ang ber, mit la thei tur ang bera siamte a ni tawh a, chung zing aṭang chuan heng music video pangate hi nominate an nih avangin a chhuanawm hlawm hle ang.