Myntra-in Jabong a lei

E-Commerce lamah Myntra chu a inla lian zel a, e-commerce lian Jabong pawh a lei leh ta. A hmain Flipkart pawh a lo lei tawh a ni.

Myntra thupuangtu chuan India e-commerce-a a dinhmun sawhngheh lehzual nan Global Fashion Group aṭangin Jabong an lei tih a puang chhuak. Myntra hian kum 2014 khan cheng vbch 2000 (maktaduai 20)-in Flipkart a lo lei tawh a, hetia a lei avang hian user active tak maktaduai 15 lai a neih theih phah a ni. Jabong a leina zat hi puanzar a la ni rih lo niin Times of India chuan a tarlang a, Firstpost chuan USD mtd 70 velin a lei niin a sawi a, chu pawh chu pawisa faiin a ni.

Global Fashion Group chuan India rama an dinhmunin an thlirin, tualchhung e-commerce-te nena insuihzawmna ṭha zawk an neih theih nan leh, tualchhung sumdawnnain hma a sawn chak lehzual nan an hralh ta niin an sawi. Global Fashion Group hi kum 2014-a din a ni a, e-commerce company paruk inchhunfin a ni. GFG sum thawh chhuah zawng zawng zaa 13 zet hi Jabong-in a thawhchhuahsak a ni.

Jabong hian hma a sawn nasa hle a, kum 2014-a heta sum lut zawng zawng hi Rs. vbch 811.4 a nih laiin, kum 2015 kha chuan Rs. vbch 869.1 zet a tling tawh a ni.

Myntra lam chuan Jabong an lei thei chu an lawm hle tih a sawi a, hei hian an sumdawnna kawngah nasa takin hma a sawntir dawn a ni an ti. A bikin fashion lamah an group, Flipkart Group chuan hma a sawn phah hle dawn a, India ramah nasa lehzuala an ṭhan an beisei. Jabong-ah hian international high street brands 1,500 chuang an awm a, seller hrang hrang aṭangin styles 150,000 chuang a awm bawk.

India ramah hian e-tailing hi a ṭhang nasa hle. Internet and Mobile Association of India-in a tarlan dan chuan December 2014 aṭanga December 2015 chhunga e-tailing ṭhanna hi 57% ngawt a ni a, chu chu Rs. vbch 24,046 (mtd 240) aṭangin Rs. vbch 37,689 (mtd 376.89) zetin a ṭhang a ni.

Jabong bik hian, Rocket Internet tarlan danin, kumin quarter hmasa berah khan Euro maktaduai 32.6 zet a sum a thawk chhuak a, kum hmasa aiin za zela 14 ngawtin a tam zawk.