Mana Motors-in Thar Roxx tlangzarh

Mana Motors chuan Ningani, September 19 zan khan Mahindra Thar Roxx chu Bawngkawna an showroom-ah an tlangzarh. Mizoramah zawrh chhuah a nih hmain mi 200 velin an hauh lawk. Booking hi October 3 aṭangin hawn a ni ang.

Thar Roxx hi petrol leh diesel engine hmanga siam niin chi hrang pasarih a awm a, two wheel drive bikah a tlawm ber Rs 14,62,460 (on-road) niin, a man to ber Rs 22,64,355 a ni thung.

Mahindra hian October 2, 2010 khan kawng chhiaa tlan chi lirthei siam kawnga hriat hlawh Thar hmasa ber a ti chhuak a; August 15, 2020-ah kawngka pathum neiin a tichhuak leh a, India rama Sport Utility Vehicle ṭha 10 zinga chhiar tel a ni. Kumin Independence Day-ah khan kawngka panga nei Thar Roxx tlangzarh a ni a, thla khat leh ni li hnuah Mizoramah pho chhuah a ni ve thung.

Principal dealer, Dr Franklin Lalrinngheta chuan dealership an hawn tirh 2013-ah Mana Motors-in tê reuh têin bul an ṭan tih a sawi a, anmahni dawrtu leh duhsaktute avangin India hmar chhak dealer zinga lian ber pawl an ni tawh tih a sawi.

Petrol engine-in TGDi mStallion 2.0 litre hmangin gear paruk a nei a, gear thlak chawp ngaiah fuat (torque) newton meter (Nm) 330 leh brake horse power (bhp) 160-a chak a pe chhuak thei a; gear thlak chawp ngai lo automatic-ah Nm 380 thleng fuat neiin bhp 175 a pe chhuak thei. Diesel engine-in mHawk 2.2 litre hmangin gear paruk tho a nei a, gear thlak chawp ngaiah fuat Nm 330 leh bhp 150; gear thlak chawp ngai lo automatic-ah Nm 370 thleng fuat neiin bhp 172 a pe chhuak thei bawk.