MZU Vibrio an zo Intihsiakna hrang hrangte a hmuhnawm

Ni nga chhung awh MZU Students’ Council buatsaih, ‘Vibrio 2015,’ Mizoram University Festival, Zirtawpni zan khan tluang tak Inferno neiin an zo fel ta. Vibrio chhung hian inelna chi 10 chuang awmin, heng inelnate hi MZU hnuaia zirna in hrang hrang leh MZU zirlaite huap a ni.

Inelna zinga ngaihven hlawh ‘Eveon Touch Runway Showdown’-ah Department of English chu pakhatna an ni a, Department of Management pahnihna an ni. Varsity Miss 2015 hi nimin lama thlan zawh niin Lalrinzuali, Dept. of Political Science chu pakhatna a ni a, Ishanika Chawngzikpuii, Dept. of Management chu 1st Runner up niin Zomuani Ralte, Dept. of Commerce chu 2nd Runner Up a ni.

Mizorama Rock Band ṭha inchher­chhuahna leh larchhuahna Rock Fest-ah ‘The Prophets’ pakhatna an ni a, ‘Sycamore’-in an dawt a ni. Got to Dance Competition, lamthiam rual fuankhawmnaah ‘Johan’s Freak’ pakhatna an ni a, ‘Jammy and Naom’ pahnihna niin ‘Riborn Crew’ chu pathumna an ni. Hnam lam chi hrang hrang phochhuahna Cultural Dance Competition-ah hian Economics Department, M.Z.U an thiam ber a, T. Romana College-in an dawt. Heng bakah hian M.Z.U zirlai huap - Writing Competition, 5 on 5 Football, Debate leh Quiz bakah Photography Competition te hlawhtling taka neih niin zirlaiten an hlut hle.

Vibrio 2015 hi University zirlaite tana inelna hrang hrang hmanga intihhlimna hunpui niin, pawn lam mite tan pawh inelna ṭhenkhat hawn a ni. Heng inelna zawng zawng hi University Campus-ah nghah vek a ni. Kuminah Festival chhimtu an ṭhahnem a, a bik takin Runway Showdown, Cultural Dance, Got to Dance leh Varsity Miss ten hlut an hlawh zual hle. A kalte tan pawn lamah ‘fun zone,’ ṭhian hoa intihhlimna siam a nih mai bakah ei leh in tur chhawpchhuah a ni reng bawk.

Kum 2007 khan Mizoram University Zirlai hruaitute (PGSU) chuan MZU festival hmasa ber a buatsaih a, he festival hming hi ‘inferno’ a ni. Hetih hunlai hian Mizoram University campus-a hmang lovin Millenium Centre Rooftop-a hman a ni a, zan khat chauh hman a ni. Kum 2008 aṭangin M.Z.U Campus-ah ngei Festival hi hman a lo ni ta a, inelna hrang hrang belh niin, a hun chhung pawtsei a ni zel bawk a, 2014-ah khan ni li chhung hman a, kumin aṭang hian ni nga chhung festival hi hman a lo ni ta a ni.