MSL Dance Battle Final turin kar khat chiah a awm ta

MSL halftime Dance battle final nei turin kar khat chiah a awm ta. Kar kalta chhung khan TBL Home crew Nerds of War, BCA Home crew Emerge leh Serpents Home crew Myn’X ten an battle ṭheuhah hnehna changin hma an hruai. Heng Crew 3 te hi Final lut thei tura dinhmun ṭha tak nei vek an ni. MSL Final dance battle-ah hian Basketball Club final-a lutte dance crew kher an ni dawn lo a, MSL dance battle chhunga crew ti ṭha ber 2 te thlan an ni dawn a ni. Hetih rual hian Basketball club final-a lut te dance crew zinga ti ṭha pakhat ve ve an lâm hrim hrim bawk dawn a ni.

Ningani zana Khatla TBL leh Chaltlang Ryders inkhelah, TBL Home crew Nerds of War leh Ryders Away crew Crazy Bee te an lam. Crazy Bee hian hma an rawn sawn a, an choreography leh concept te pawh a ṭha viau a, mahse showmanship leh confidence an tlachham hle a, hei hian a pawt thla ta a ni. Nerds of War hi ṭum dang ang bawkin an lam en a hmuhnawm a, mahse an choreography execution ah ṭum dang an tluk lo hle. Duh­thusam loh lai awm a zawm zeuh zeuh a, mahse an lam ti buai loin a tir aṭanga a tawp thlengin theih­tawp an rawn chhuah. An expression leh showmanship an rawn chakpui ta a ni. Hemi zan hian Special Performance a awm a, MZU Got 2 Dance 2015 Winner Johan’s Freak, Lunglei aṭanga lo kal Dance crew te chuan an lam hmuhnawm tak an rawn entir a ni.

Zirtawpni tlaia Zarkawt BCA leh Mission Veng Vikings inkhelah BCA Home crew Emerge leh Vikings Away crew Dance & Beatz te an inhmachhawn. Dance & Beatz hian costume an rawn nei mawi thei hle a, an lam pawh a rawn zia chho viau a, mahse hmasawnna tur kawng hrang hrangin an la nei zeuh zeuh a; Emerge crew te hi an rawn hneh zo ta lo a ni. Emerge hian an choreography-ah theatric leh nuihzatthlak laite poh an rawn telh leh a, an hmuhnawm dangdai thei hle. An execution leh performance hrim hrim a ṭha. An dance battle hnuhnung ber a ni.

Zirtawpni zana Zarkawt Serpents leh Tuikual South Basketball Club inkhelah, Serpents Home crew Myn’X leh Tuikual South Away crew Myztic Movers te an ve leh thung. Myztic Movers hian an battle hnuhnung ber a nih angin an concept-ah zombie te rawn hmangin an rawn ti ṭha hle a, mahse an choreography leh execution-ah Myn’X an hneh zo lo deuh a ni. Myn’X tan poh hian an battle hnuhnung ber a nih angin an member 6 te an rawn lam kim. An lam a hmuhnawm a, an performance hi a rawn nung ṭha ṭhin hle. MSL battle chhungin an tumpui te an hneh kim vek a ni. Zarkawt Serpents tan pawh lawmna tham a tling a ni.

MSL Dance Crew 12 aṭang hian 6 te chuan an battle hnuhnung ber an hmachhawn kim tawh a, tunkar hian a bang 6 ten a tawp nan an lam ve leh thung ang. Ningani zanah Tuikual South Home crew BGMX leh BCA Away crew Anonymous Signs te an inhmachhawn ang. Friday tlaiah TBL Home crew Nerds of War leh Serpents Away crew Monadikos te an lam ve leh thung ang. Friday zanah Ryders Home crew Sharp Kats leh Vikings Away crew Dance & Beatz te an in-battle ve thung ang. Final lut tur crew 2 te hi hriat a chakawm tawh hle a, a hma zawnga dance off format a kal tawh loin Final zan hi chuan Dance battle tak tak an nei dawn. Hetihrual hian Final zanah dance crew zawng zawng an rawn che leh bawk dawn a ni. Group performance niin, crew bika lam loin an rawn lamho vek dawn a, a hmuhnawm hle ang.