GMA Dove Award-a perform turte puang ṭan

Gospel music award ngaihhlut, Gospel Music Association (GMA) buatsaih 55th Annual GMA Dove Awards neih tura perform turte an puang ṭan. Khawvel huapa Gospel artist langsar tak takte an inlan dawn.

GMA-in artist perform turte a puanna hmasa berah CeCe Winans, Crowder, Forrest Frank, Joseph Habedank, Maverick City Music with Naomi Raine, Natalie Grant, leh Tauren Wells te an tel. Perform tur dang pawh puan chhunzawm a la ni ang.

55th Annual GMA Dove Awards hi October 1, 2024 hian Nashville, Tennessee-a Lipscomb Allen Arena ah neih a ni dawn a, Tauren Welss chuan a show hi a host dawn a, a perform dawn bawk a ni. Jackie Patillo leh Justin Fratt te chu showrunner leh executive producer niin, Curtis Stonebeger leh Paul Wright chu producer an ni. Kumina award sem turah hian Brandon Lake chuan nomination hmu hnem berin 16 a hmu a, nomination hmu hnem dangte chu Jeff Pardo (11), Chris Brown (10), Chandler Moore (10), writer-producer Jonathan Smith (10), Winans (5) leh Raine (5) te an ni.

Dove Awards hi Kristian music industry-a hlawhtlinna hrang hrang changte chawimawina atan Gospel Music Association (GM), US in a buatsaih niin, kum 1969 khan GMA Dove Awards hmasa ber chu Memphis, Tennessee-ah neih a ni. Kum 1971 aṭang khan show hi Nashville-ah sawnin kum 2011 thleng chhunzawm a ni a, kum 2012-ah Atlanta, Georgia-ah neiin, 2013-ah Nashville lamah an kir leh a ni.

Kumina awards sem turah hian category 39 zet a awm a, hengte hi division paliah ṭhen niin Division I-ah category 6 a awm a, Division II-ah category 14, Division III-ah 12 leh Division IV-ah category 7 an awm.