Coldplay-in Mumbai-ah concert neih belh dawn

British band, Coldplay chuan Music of the Spheres World Tour an neih puala nakkum January 18 leh19-a Mumbai-a concert vawi hnih an neih tur atana ticket chu zawrh chhuah a nih aṭanga rei loteah an hralh zawh nghal vek avangin, concert hi vawi khat dang an neih belh leh dawn.

Nakkum January thlaa concert neih tur atan hian nimin khan ticket hi hralh chhuah a ni a, mahse reiloteah concert vawi hnih neihna tur atana ticket te hi hralh zawh nghal a ni. Hei vang hian January 21, 2025-ah a vawi thumna atan concert hi an neih belh dawn tih an puang a, hemi atana ticket hi nimin chawhnu khan zawrh chhuah leh nghal a ni.

Coldplay hian concert vawi thum an neih tur hi a hmun ngai, Mumbai-a DY Patil Stadium ah vek an nei ang. Coldplay India concert ticket hralhtu, BookMyShow server chu booking hawn a nih aṭangin lut an tam lutuk avangin a crash hial a, mahse minute 29 hnu velah siam ṭhat leh a ni.