Essy pakhatnaah a awm ta
1. Essy - Hey
2. J. Lalremruati - Inhrilh dun ang
3. C Sanga - Chhingkhual Lenmawi
4. Lawmi Khiangte - Mangṭha
5. Christy - Tleitiri
6. Sumeona - Ka bang ngei ang
7. Kolkata Mizo Student - Kan ding (Zoram tan)
8. Christy - Chhingkhual D
9. Henry Lalmalsawma Renthlei - Lokir leh rawh
10. Thiamchantira - Lokir rawh
Pakhatna a luh mai a beiseiawm viau laiin J. Lalremruati a khauh ang reng hle a, mahse a tawpa tawpah chuan Essy hla Hey chu Dafodils Ṭhazual 10-ah pakhatna a rawn hauh thei ta.
Lelte Awards-a New Artiste of the Year-a thlan Essy chuan New Artist chawimawina dawng thei tur a nihzia a rawn lantir chiang a, Ṭhazual chart-ah pakhatna a rawn hauh. Essy hian Mizo Idol-a a inlan hnuah music video pahnih chauh a la tichhuak a, pakhatna an hauh thei ve ve. Tuna mi, Hey phei hi chu Ṭhazual chart-ah, vawi khat lanna ni sang nghal thei ber pahnih zinga pakhat a ni a, a vawi khat rawn lannaah 3-na a rawn ni nghal thei a ni.
'Hey' hi March 9-a Dafodils Ṭhazual Lengzem chart tihchhuah aṭangin pathumnaah a rawn lang ṭan a, hma a sawn duai duai tura ngaih a nih lai, lengzem huang chhungah music video ṭha a tam vanglai tak a ni. March 23 khan pahnihnaah a chho a, April 6 khan pahnihnaah bawk a awm a, tunah chuan pakhatnaah a awm ta. Pakhatnaa thleng tur hian chart-ah ṭum thum a ṭhu hman a, pakhatna ni hma pawl tak chu a ni hrim hrim. Hei hian Essy zaithiamzia leh a hla ṭhatzia a tarlang awm e. He hla hi zaithiam tho, Lal K Sailo leh Myztic Sailo te phuah a ni.
Pakhatna ṭum thum zet a hauh hnuah J. Lalremruati hla hit 'Inhrilh dun ang' tih chu pahnihnaah a chhuk thla ve ta. J. Lalremruati hi a thiam a, a stage performance a hmuhnawm bawk. Pakhatna ṭum thum lai a hauh thei pawh kha a mak lo e.
C. Sanga chu pathumnaah bawk a la awm a, a zaithiamzia leh a video ṭhat dan ngaihtuahin pakhatna hauh thei dinhmunah a ding ve tho mai. Christy chu palina aṭangin panganaah a chhuk a, a hmun hi Lawmi Khiangtein a rawn luah thung. Christy hian tunah hian top 10-ah hla pahnih a nei mek a, pakhat zawk hi 8-naah a awm. Top 10 aṭangin DJ Lalvenhimi a chhuak a, Thiamchantira a rawn lang thar. A bak zawng an la pangngai e.