Video thar a peih leh tawh e

Mizo Idol top 3, Lancy Remlalhruaii chuan music video thar a siam peih leh tawh a, cable TV-ah dah nghal a ni. Serchhip nula zaithiam hian hnuhma thar neih zel a tum.

Lancy-i hla thar hi 'Min kai la, min hruai rawh' tih a ni a, he hla hi tunlaia hla phuahtu lar zinga mi, Lalremruata, Mapuia tia kan hriat lar hla phuah a ni. Mapuia hian hla eng emaw zat a phuah tawh a, a hla phuahte hi zaithiam hrang hrangten an sa a, a hla phuah dahkhawmna album pawh pathum lai siam a ni tawh a ni.

Lancy-i music video thar hi Tea Chhakchhuak kutchuak a ni a, a music hi Puia Chhakchhuak (Music Care) kuthnu a ni. Mizo Idol aṭang khan Lancy Remlalhruaii aw kan hre tawh a, a music video pawhin ngaihhlut a hlawh a, experience a ngah tial tial a, ngaihthlak a nuam tial tial niin alang.

Tuna music video hi Mapuia Gospel Hlaa dah tur a ni a, he project hi kumina peih hman tura ruahman a ni; Mapuia hla phuah, Pathian fakna hlate dahkhawm a ni ang. He project-ah hian zaithiam lar dang tam tak an zai dawn a, chung zingah chuan Pensy, Bethsy, Lallawmawma, Ramchhana, Lalhlumawii, VLA te leh mi hrang hrang an zai ang. Kumin favang lam hi chuan peih hman tum a ni. Lengzem lamah Essy, Ramtiami, T-Melody te beisei an ni bawk.