Samak var chi an veng uluk
Khawvela samak var chi khat, northern white rhino, a pa la dam awm chhun, Sudan tia an koh, Kenya-a Ol Pejeta Conservancy chhunga mite chu sapeltuten an tihhlum loh nan Kenya sorkar chuan sipai, silai kengte darkar 24 chhung a vêntir tawp.
Sudan hi tunah hian kum 32 a ni tawh a, dan pangngaiin chi a thlah thei tawh lo niin, he conservancy-a an hotu, George Paul chuan CNN a hrilh. A chi-ah chi nung a tlem tawh hle niin a sawi. Hei bakah white rhino te vanduaina pakhat chu, Sudan hi la chak ṭha tak pawh nise, a nu pahnih dang hi an upa lutuk tawha an chunga Sudan bawk turin an kein a zo tawh lo a ni.
Sudan hi Northern White Rhino a ni a, black rhino te nena inthlahpawlhtira northern white rhino tihpun leh tum a theih loh a, tihdan kawng awm chhun nia lang chu southern white rhino te nena inthlahpawlhtir a ni. Khawvela white rhino zingah southern white rhino te chauh hi endengered species zinga tel lo an ni.
Sapeltuten samak an kap nasa hle a, kum 2013 chhung chauh pawh khan South Africa-ah chuan samak 1004 lai an kap. South Africa hi southern white rhino tamna hmun a ni a, sing hnih vel lai an awm a, black rhino hi 5000 vel an awm bawk. Northern white rhino hi kum 2007 khan, ramhnuaia awm hi pali vel nia hriat an ni a, sahuanah panga vel an awm bawk.
Samak hi Africa loah chuan Asia-ah chauh a awm a, Assam samak ang hi 3000 chuang an la awm a, sumatran rhino an tih hi za aiin an tlem tawh a, Javan Rhino phei chu 35-45 inkar vel chauh an awm tawh a ni.