Ṭhazual Awards Gospel hmeichhiate an ṭha hlawm

Ṭhazual Awards sem tura buaipui mekah, nominate tarlan a ni tawh a, National Business Enterprise Best Female Artist (Gospel)-a langte an ṭha hlawm hle a, rin thiam a harsa. Zaithiam langsar tak tak, lang tura beisei, lang si lo pawh an awm nual awm e.

He category-ah hian Pensy, Maggie, Mawitei, Judith leh Nunui te an awm a, an ṭha tlang ṭhe ṭhaw hle. Pensy hi 'Nitinin hmangaih che ka duh' hla hmangin he category-ah hian a awm. Nikum chhung khan Pensy hian music video ṭha tak tak a nei a, Bethsy nena an sak 'Angelten an awmpui' tih te, 'I hnen ka lo kir' tih te, 'Chhan tlak ka ni em ni' tih te a nei bawk a, hengte pawh hi hit tak tak vek an ni. 'Nitinin hmangaih che ka duh' tih hla bik hi nikum chhung khan Ṭhazual Chart-ah vawi 10 a lang a, pakhatna ṭum li zet a ni nghe nghe. A nih hniam berin pariatna a ni a, pahnih ṭum hnih leh pathumna ṭum khat he hla hmang hian a hauh.

Maggie, Margareth Malsawmzuali hian nikum chhung khan music video pahnih, chart-a lang thei a nei. Pakhat chu Isu Êng La tih kha a ni a, chart-ah pawh a hlawhtling hle a ni. Tuna Maggie lanna hi 'Min siam thar rawh' tih a ni a, he hla hi Ṭhazual Chart-ah vawi kua a lang a, pakhatna vawi khat a ni nghe nghe. Pahnihnaah ṭum hnih a awm a, pathumna ṭum khat a hauh bawk.

'Ka thlang ber zel ang che' tih chauh hi Mawitei'n nikuma music video a neih a ni. Mahse he hla hi a hlawhtlinpui hle a, Ṭhazualah vawi 13 ngawt a lang thei a, Best Female (Gospel) category chhunga hla mala chart-a lang ngun ber a ni. Pakhatna ringawt pawh ṭum thum zet a hauh a, pahnihnaah ṭum hnih a awm a, palinaah ṭum thum lai a lang bawk.

National Business Enterprise Best Female Artist (Gospel)-a lang zinga mi Judith Lalremruati hian nikum khan music video chart-a lang pathum a nei a, an vai hian nikuma an tihchhuah vek erawh a ni kher lo thei. A nuṭa, Lawma nena an sak 'I hming ropui' kha a hlawhtling hle a, chubakah 'Lalpa chak lo mah ila' tih chu hla thlan hlawh ber zinga mi a ni. Tuna nominate, 'Halleluia' tih hla hi a hla zinga chart-a thleng sang lo ber a ni thei zawk hial mai thei. Top 5-ah a lang lo a, parukna ṭum li a hauh a, 10-naah leh pariatnaah a lang bawk.

Nunui pawh hi a hla hit 'Ka rinchhan Lalpa' tih nen hian nikum chhung khan Ṭhazualah hian a che hit hle. He hla hmang hian Ṭhazual chart-ah vawi 11 zet a lang thei a, pakhatna ṭum khat a hauh nghe nghe. Pahnihnaah ṭum hnih a awm a, pathum ṭum khat a hauh bawk. Top 5-a lan theihna zawng zawngah a lang kim a ni. Tuna National Business Enterprise Best Female Artist (Gospel)-ah pawh hian a buk rit ber zinga mi a ni ngei ang.