Zonet Arkaiden Zan: CFL Hmingthanga Zan

September thla Zonet Arkaiden Zan programme chu zaninah hman a ni dawn a, zaithiam leh hlaphuah thiam, CFL Hmingthanga pualin hun hman a ni ang. Vaivakawn Auditorium-ah zan dar 8 aṭangin programme hi hman ṭan a ni dawn a, Zonet Zawlbuk, Zonet HD leh Zonet Empai App-ah live a pek chhuah a ni leh ang. A hmuna chhim duh tan Rs 200 entry fee a awm bawk ang.

Host Zonuni Pachuau kaihhruaina hnuaiah hun hman a ni leh dawn a; David Darlong, Ticos-a, Ngura, Hmangaiha, Siampuii Ralte, Marina Varte, Aengi leh Rosalyn ten CFL-a hlate an sa dawn a ni. CFL-a Hringnun lamtluang tarlanna video display buatsaihin, an chhungkaw lam aṭangin thusawi tawi ngaihthlak a ni ang a, Zonet lam aṭangin citation hlanna hun hman a ni bawk ang.

CFL Hmingthanga hi November 15, 1968-ah Samthang khuaah a piang a, kum 2012, September 9-ah a boral a ni. A naupan tet aṭanga rimawi tuipui niin, 1980 chhoah a ṭhiante nen group an din a, kum 1983 aṭangin mal zaiin a kal ṭan a ni. Tleirawl chhuah aṭangin hla a phuah a, hla phuah pawh a awlsam hle a, hla100 vel a phuah nia hriat a ni. Audio album 12 - Ngaihlai Masang, Roosna Hmelṭha, Chhanlet loh Hmagaihna, Kur Diam Diam, Tunge Hmelṭha Ber, Lam dun ang/I tan ka lo kir leh, Min hriat chhuah tir, Hlim la nui rawh, Ka Star No 1, Theihnghilh ngai loh, Lemchan Khawvel leh Hla Inchhang Special te a siam hman. A album-a hlate hi ama phuah vek an ni. Heng bakah hian collection hrang hrangah a zai nual bawk. AIR, Aizawl ah hla 45 vel a record a, Radio-ah hian B High Graded Artist niin, Aizawl Doordarshan-ah music video 12 vel a record bawk.

CFL-a hlate hi a hunlai chuan Zoram pum an deng chhuak hlawm a, hla inchhawn hi a phuah, C. Lalkhumi (L) nena an sak, 'Intawng leh ngei ang' tih phei chu LPS Top 10 Countdown-ah thla thum chhung No 1 a ni a, 1992 khan kum khat chhunga LPS hla thlangtu ngah berah puan a ni bawk.