Harley-Davidson India aṭangin inkhalh chhuak dawn
American motorcycle manufacturer Harley-Davidson chuan khawvela motorcycle market lian ber India aṭangin an inlachhuak dawn tih an tarlang.
Kar hmasa khan Toyata pawhin India ramah tax an chawi a san avangin an market an zauh dawn lo tih an lo sawi tawha, Harley Davidson pawh hian tunah chuan India ramah an market an tihtawp dawn thu an sawi ve leh ta a ni.
Harley-in India an chhuahsanna turah hian restructuring cost $maktaduai 75 zet pawh a tel a, redundancy 70 vel leh India hmar lama Bawal plant-te pawh a tel. Bawal plant hi kum 2011 khan Harley-Davidson hian an hawng a ni.
BBC chuan India ram chu developing country dangte aia motorcycle tlawmna hmun ni mah se ramdang lirthei siamtute tan chuan market siam kawngah harsatna a tam hle niin a tarlang. Hemi a nih avang hian kum 2017 pawh khan General Motos pawh India ram aṭangin a lo inhnukdawk tawh nghe nghe. Ford pawhin nikkum lam khan Indian vehicle giant Mahindra nena thawhdunna tur kawng a lo dap tawh bawk a nih kha.
US president Donald Trump pawhin hmanni lawk khan India rama chhiah chawi a tam chungchang hi a lo sawisel tawh a, Harley-Davidson bike-a chhiah a san chungchang pawh hi a lo sawilang hial tawh a ni.
September thla tir lam aṭang khan Harley-Davidson-in India an chhuahsan tur chungchang hi sawi lan a ni ṭan tawh a, tunah an chhuahsan dawn tak tak takah chuan India rama Harley-Davidson bike neitute chu an mangang ṭan hle niin moneycontrol chuan a tarlang. India ramah hian bike 25,000 vel an hralh tawhin dealership 33 an nei.
Lirthei ke pahnih nei hralh kalna ber ram India-ah hian kum khatah bike leh scooter maktaduai 17 vel hralh ziah anga chhut a ni.
Great Depression paltlangtu 'Hogs'
Harley-Davidson hi a nickname-ah 'Hogs' tiin an sawi ṭhin a, kum 1903-ah daih tawh khan company hi din tawhin American motorcycle company Indian nen hian American motorcycle manufacturer zinga Great Depression (khawvel economic tlak chhiat tak tak lai) paltlang thei langsar an ni.
Kum 1969 aṭang khan khawvel ram dang an hrut chho ṭan a, US, Brazil leh Thailand-ahte pawh factory an nei bawk. Indopui II-na laia US sipaite tana bike tam tak siam saktu an ni bawk a, khawvela bike company ngaih hlut hlawh ber zinga mi a ni.