Lengzem mipa an intluktlang

Zonet-in Ṭhazual Awards an buatsaih turah IC Big Bazar Best Male Artist-a nominee-teho hi an intluk tlang viauin a lang a, an ṭha tlang hlawm viau. An music video leh, kum 2014 chhunga Ṭhazual Chart-a an dinhmun pawh a inthlau lutuk hlawm lem lo.

Raymond Lalhriat­puia Hnamte hian music video a la siam tam lo nain, nikuma a music video 'Eng dang ka dawn thei lo' tih kha chu a hit viau a ni. He music video hmangin Male artist category-a rawn lang pawh a ni. He hla hi Ṭhazual Chart-ah nikum chhung khan vawi 14 zet a lang a, mahse pakhatna êm erawh a hauh lo. Chuti chu ni mah se, hla hit leh hlawhtling a nihna erawh a bo lo. Pahnihnaah ṭum khat a awm a, pathumna pawh ṭum hnih a hauh thei. Palina leh pangana vawi khat ve ve a hauh bawk. Chart-a lang hnem leh lang rei aṭanga thlan tur chu nise, he category-a chungnung ber hi a ni ngei ang.
Mizo Idol aṭangin Zoram khawvelin kan hmelhriat a, Thiam­chan­tira hi a zai thiam mai bakah hla phuah a thiam em em. Tuna nominate, a hla 'Rinawmin' tih hi Lengzem mipaa Ṭha­zual Chart-a thleng sang berte zinga mi a ni. Chart-a vawi 13 zet a lang a, ṭum thum lai pakhatna a hauh nghe nghe. Hei bakah hian pahnihaah ṭum khat, pathumnaah ṭum hnih, palinaah ṭum hnih leh panganaah ṭum khat a awm.
Mipatena zaithiam an tih, aw pa si, C. Sanga hi zaithiam zinga a hun hmang tluan ṭha pawl a ni awm e. Nominee-a a lang pawh hi a âwm ber zinga mi a ni hial ang. C. Lalrinmawia'n a lo larpui tawh LT A Mak Ka Ti hla a rawn vawrh sang leh thei a, a ropui hle. Nikum chhung khan chart-ah ṭum 11 a lang a, pa­khat ṭum thum lai a ni. Pahnihnaah ṭum khat a awm a, pa­thumna ṭum hnih, pa­lina ṭum hnih leh pangana ṭum khat a ni bawk.
Biakmuana hi tunlai zaithiam kan neih, lengzem mipa huang chhungah chuan a ṭha ber zinga mi a ni. Min Hlan Lai Khan tih hla hi nikum khan pakhatnaah ṭum hnih lai a lang thei. Biakmuana hi he hla hmang hian chart-ah ṭum kua a lang a, pahnihnaah vawi khat a awm a, pathumna phei chu vawi thum lai a ni nghe nghe. H. Vanlalngura hi a ropui a, mipaah chuan beiseiawm pawl a ni pha ang. A hla 'Ka rawn zawng zel' tih kha nikum chhung khan chart-ah vawi li a lang hman a, sawmnaah vawi hnih, pakuanaah vawi khat leh paruknaah vawi khat a lang.
Ṭhazual Awards sem turah hian category tina tling, lawmman latute hian pawisa faiin Rs. 15,000 an dawng tel dawn a ni. May thla hian sem hman tuma ruahman leh puahchah mek a ni.