Erick Chenkual leh Tonum Symbals thawk dun dawn

The Breeze drummer, Mizo Idol lama an khuangpu ni bawk Erick Chenkual chu Ukraine drums symbals company 'Tonum Symbals'-in endorsement deal an siam pui.

'Tonum Symbals' hian Erick-a puala an symbals siam hi an rawn thawn tawh nghe nghe a, hrechiang duh tan chuan a YouTube channel lamah unboxing video-te pawh a dah chhuak tawh.

'Tonum Symbals' hi company la naupang tak an ni a, Ukraine lamah hmunpui nei mah se factory erawh Turkey lamah nei thungin khawvel hmun hrang hrangah artist hming chher mekte an thawhpui ṭan a, chung zingah chuan Erick Chenkual pawh hi a tel ve a ni.

Erick Chenkual chuan Instagram lam aṭanga a hmelhriat thu sawiin a zuk biakpawh hnuah Mizo Idol leh show hrang hranga a drums vuakna video-te a thawn a, chung chu uluk taka company lamin an lo thlir hnuah inremna siampui tura an thlan zingah a tel ve ta tih Vanglaini a hrilh.

Inremna an siamna hnuaiah hian hamṭhatna awm thei hrang hrang Erick-a hian a dawng thei dawn a, chutih rual erawh chuan 'Tonum Symbals' chiah hi a hmang thei tawh dawn thung a, 'Tonum Symbals' official artist zingah a hming ziah luh a nih tawh avangin Mizoram lamah an company chu a tihlar sak ve a ngai tawh dawn thung.

Erick-a chuan 'Tonum Symbals' chu ri ṭha ve si, company dang aia tlawm zawk a nih thu a sawi a, class hrang hrang a awm a, a class hniam deuh phei chu Rs sang khat tling lote pawhin a awm a ni, a ti. Kan ram economy nena inmil tak company, beginner tan pawha hman chi tak company an ni tih a sawi bawk a ni.

Mizo zingah hian drummer ṭha, company in an artist-a an hman midang pawh an awm tawh a, IIIrd Sovereign drummer Reuben hi Mapex-in tunhma deuh khan an thawhpui tawh a, tunlaia Mizo drummer lar ber pawl Mamoia hi Roland VDrum artist a ni bawk.