Vanglaini Bihchianna (Entrepreneur Huang) : TRIBELAND COFFEE

Kum 2019 khan P.B Lalrinfela chuan a sum khawl hmangin TRIBELAND COFFEE hi a din ve rawih a, mahse Covid 19 hripui lengin harsatna hrang hrang a rawn thlen chhoh tak avangin kum khat chuang chu a duh angin hna a chhunzawm thei ta lo a ni. Kum 2021-ah co-founder, Lalhruaitluanga leh P.B. Lalduhzuala ten an rawn zawm ta a, an pathuma theihtawpa hma la chhoin khawl thar te an lei belh thei ta a ni. MZU BioNest Incubation Center-a hna thawk ten duhsakin, an room an hman hawh tirna zarah kum 2022, June thla aṭangin siamchhuah hna hi an ṭan a. Kum 2024 May aṭangin company a in register in, TRIBELAND FOODPRO PVT. LTD. tia thlak a ni ta a ni.

Thil tum:

TRIBELAND FOODPRO PVT. LTD. in a tum ber chu Mizorama coffee chingtute thar chhuah awmze nei leh hlawk zawka lei sak leh coffee quality ṭha zawk, Mizo ten kan in ve theih nan thar chhuah a nih theihna tura hma lak pui a ni. Hemi atan hian production unit leh processing unit te pawh an siam a, mipuiin a an mamawh dan tur ang zelin an buaipui a ni

Thawktu :

Hnathawk reuglar hi tunah hian mi 7 an awm mek a ni. Thawktute hi thla biin an hlawh pek an ni a; Office, Industry leh Cafe lam ah te an thawk a ni.

Thil siam chhuahte :

Product hi chi hnih a kalpui niin, Roasted Coffee leh Instant Coffee te an ni a. Roasted Coffee hi a tlangpuiin Cafe ah leh mimal ten an lei nasa. Instant Coffee hnuai ah hian Product chi hnih Classic Brew leh Mocha Loco te siam mek a ni. Tunah hian an thil siam chhuahte hi Mart leh Office ah te sem kual a ni a, district hrang hrangah thawn chhuah theih vek turin an buaipui mek a, tihfel theih thuai pawh an beisei

Hmachhawp :

TRIBELAND FOODPRO PVT. LTD. hian hmachawp tam tak an nei a, heng aṭanga an tum ber chu mi na zawngin an ngaihsak vak loh ni si, mahse mihring in kan mamawhna sang em em Agriculture leh Horticulture lam product hi khawih zel an tum a ni.

Harsatna :

TRIBELAND FOODPRO PVT. LTD. lo din chhuahna kawngah hian harsatna pawh an tawk nasa ve ṭhin hle. Thiam saa ti an nih loh avangin an inzir chawp a, sorkar lam ngaihsak an hlawh loh avangin an tan pawh thil tih harsat chang a tam hle. An sum neih ang chhun bakah, Bank nena ṭangkawpin an bei chho a, Bionest MZU lam ten an puihna a zarah hma an sawn chho ve bek bek a ni.

Entrepreneurship chungchang :

"Mahni kutkawih hmanga eizawnna, entrepreneurship hi thil awlsam leh kawng awlsam a ni lo a, mi tlemte chauhin a an tih theih leh tawrhchhel ngai tak thil a ni. Mutmu tuah mang loa hnathawh ngaih ni a tam a, beidawnna nitina ngam tu nih a ngai hle bawk. Chutih rual chuan mi kan ṭanpui theihna kawng ṭha tak a nih na hi a hlimawm a, midang tana eizawnna leh hna siamsaktu kan nihnaah hian a hlu kan ti hle bawk a ni, " tiin co-founder Lalhruaitluanga chuan a sawi.