Henry Varte a reh rei lutuk tawh lo ang

A buai avangin music thar pawh a ngaihtuah hman mang lo a, hunawl a neih kar hlekah a theih ang ang chuan a inbuatsaih chho a, a music thar tur pawh hma a sawnpui ve hret hret zel

A ṭhianteho nen music video hit tak tak an tichhuak a, Parema album, Ka Rinchhan Lalpaah a zai bak kha chu Henry Varte hian music tharlam vak a nei lo, mahse a reh rei tawh lo ang, kumin hi chuan ama solo mai bakah an ṭhianho video thar a rawn chhuak ngei dawn.
Henry Varte hian hun a neih tlem avangin music thar a ngaihtuah hman mang lo. Cardinal Choir-ah a awm a, Kulikawn Pastor Bial Zaipawl a ni a, an kohhranin kum 100 an lawm chhoh mekah, kohhran zaipawla a pawimawh ber zinga mi a nih avangin hun a nei tlem hle a, hei bakah hian Indian Fine Blanks chuan Ambassador-ah an hmang a, chu mai piah lamah, pawn lama zai tura sawmna chhân sên loh a hmu bawk. Tunah hian IHM Event Management-ah chairman a ni bawk a, inneih leh function hrang hrangte an manage sak a, hengte avang hian music thar a ngaihtuah hman mang lo a ni.
Heti chung hian Henry Varte hian reh reng erawh a tum lo a, tunah hian hma a la mek. Hla pahnih a buaipui chho ṭan mek a, pakhat zawk hi mitthi lam lam, khawhar pual lam deuh a ni a, hemi a zawh hunah a solo pakhat dang a buaipui leh ang. A solo tur hi Drop Doubt-a an vocalist, MSA hla a ni dawn a, tunah hian a track an peihfel tawh a, a dang chu muangchanga la siam chhoh zel tur a ni ang a, khawhar pual lam hi an peihfel hunah a chhunzawm ang.
Henry Varte hi Freddie leh TBCA te nen pawn an la kal chhunzawm chho zel dawn. Nikum daih tawh khan hla pakhat chu an buaipui tawh a, mahse an laklawh laiin Freddie-a chu US-a a kal a ngaih leh tak thut avangin an chhunzawm thei lo. Freddie hi August thla hian a rawn haw leh ang a, a rawn haw hun hunah an chhunzawm lehnghal ang.
"Pawn lama zaina hrang hrang ka ngah a, kohhran rawngbawlna thilah ka buai viau bawk a, chuvang chuan music thar pawh ka ngaihtuah hlei thei lo a, ka buai viau a ni. Hei bakah hian IHM Event Management-ah chairman ka ni a, event hrang hrang - inneih, official function, birthday party leh thil hrang hrang kan buaipui a, hun ka nei tlem. Hetianga min hmang duh an awm chuan kan buaipui thei reng a ni," a ti.
"Tunah hian North East Mister & Miss Competition, Guwahati-a neih turah zai turin min rawn sawm a, mahse ka la confirm thei rih lo, hna leh buaipui tur ka ngah rih. IFB ten Ambassador-ah min hmang bawk sia, chet chhuahna tur a awm ve reng a ni," a ti.