Rayvon tan lawmna, Quentin tan ṭahna

American Idol a pui tial tial a, Nilaini zana intihsiak leh result puanah Rayvon bawk a vannei leh a, Quentin Alexander tan erawh Rayvon-a vanneihna chu a vanduaina a ni ta thung.

Nilaini zan hian hla pahnih ṭheuh an sa leh a, Jax Cole a rawn lang hmasa ber a, Are You Gonna Be My Girl leh White Flag hlate a rawn sa a, top 5-ah a tling. A dawtah Nick Fradiani a rawn zai leh a, ani pawh top 5-ah a inhlangkai. Clark Beckham pawhin anni pahnih hi a rawn zawm ve leh. Tyanna Jones chuan a hla hmasa zawkah Party In The USA a rawn sa a, a perform a ropui tehchiam lo. A hla pahnihnaah Heaven a rawn sa a, Jennifer Lopez-in sa thiam a ti hle, a tlang ve leh ta a ni.

Quentin Alexander a rawn lang a, Light My Fire hla a rawn sa phawt, J.Lo bawkin a fak a, Harry chuan a arrange a ṭha hle niin a sawi bawk. Keith pawh Quentin hi a fak luam a, zaithiam dangte aiin a danglam tlat niin a sawi; an komen aṭang chuan ngaihṭhatna tur a ni. A hnuah Shake It Out a rawn sa leh a, hei pawh an faksak leh hle.

A hmaa Twitter Save hmanga tling, Rayvon chuan Im Not The Only One a rawn sa, an fak hle a, J.Lo chuan hma a sawn hle niin a sawi. Go Your Own Way a rawn sa leh a, J.Lo bawkin a fak nasa leh hle.

Fak nasat pahnih zingah, Twitter Instant Save result an puang a, Rayvon a vannei ta zawk. Rayvon hi tling hram hram chungin a inhlangkai sang ta hle. Quentin Alexander a tla ta a ni.