Praise On 2024 Audition-ah mi 137 an tlang

SYNFO leh Central KṬP buatsaih, mal zai intihsiakna Praise On 2024 audition zawhfel a ni ta a, mi 137 in audition hi paltlangin First Round intihsiakna an hmachhawn dawn a ni.

Praise On 2024 audition hi district hrang hrangah September 6 - 21 chhunga neih a nih hnuin, September 25-28 ah Tuikual Kohhranah Aizawl audition neih chhunzawm leh a ni a, September 29 zanah audition result hi puan a ni. Audition paltlangte hian October 14 - 16, 2024 chhungin Saron Veng Kohhranah First Round intihsiakna hi chhun lamah an nei dawn a, acoustic guitar leh keyboard hmanga zai rem tur a ni ang. First Round result hi October 16, 2024 zanah puan a ni ang a,mi 30 vel thlan chhuah tum a ni.

Second Round intihsiakna hi Saron Veng Kohhran Hall-ah October 24 & 25 ah zan lamah neih a ni leh dawn a, Second Round aṭang hian Hruaina Eng TV leh Synod Information YouTube Channel-ah Live-a pek chhuah ṭan a ni ang.