Fashion Fiesta

A lo luh chiah aṭangin kan naute lamin an buaipui fal hle a, han en mai pawh hian midang aia a ṭhat chungchuan bikna emaw a changkan nalh bik em emna pawh ka hre lo. Mahse eng emaw ni riau a nei tlat, a incheina enin a simple-hle a, mi bakin a inchei lo. Amaherawhchu, amah kan ngaihven chûk nachhan leh mi hiptu riau eng emaw ni thil a nei tlat. A chhuah hnu chuan kan sawi sap sap a, kil khata ṭhu chung chuan ka ngaihtuah vang vang a, a kal liam hnu pawh chuan kan awmna chhung chu a rim (rimtui tak mai) chuan a la khat tlat a; a rimtui takzet a ni. Engtin emaw ni riau hian mi a tidanglam tlat. Rimtui tih zawng leh ngainat zawng chu a inang miah lo, thil rimchhia leh rim thip tak te ai chuan rimtui na na na chu kan ngaina tlang ṭheuh awm e. Hei vang te pawh hi a niang, kha nula eng teh ual ni lo, khati taka kan lo ngaihven chiam chhan kha a rimtui inhnawih aṭang khan a mizia zawng zawng hre lo mah ila eng ang mi nge a ni tih tlangpui chu a hriat theih awm e. Heng min tirimtui em emtu leh midang laka min tilangsartu hi eng nge maw a nih a, ṭhenkhat tan thil ho lam deuh ni si, man to tak taka kan lei chhan hi hriatchhuah i tum dawn teh ang.

Ka sawi tum leh sawi mek hi chu a tam zawk chuan kan hre vek awm e. A tu a te mahin kan chik lem lo bawk. Tunlai ṭhangtharte phei chuan aman toah kan inel ta emaw tih turin a changkang leh man to, designers siamchhuah deuh kher kan hman loh chuan kan rimtui ta lo emaw ni chu aw tih turin designers perfume ni lo hman kan zak ta. A pawimawh ber chu neih sumin a tlin chuan a tu a te pawhin hmang se kan sawi ve theih pawh va ni suh. Nu leh Pa thawhchhuah ring a, lo inlak tunlai ve viauna atan chuan a chi lem loh. Heng Eau de parfum, Eau de toilette, Eau de Colonge leh Eau de Spray-te hi perfume changkang leh man to tak tak hmang ho hian a pawimawhna leh eng nge a nih tih pawh kan hre kher awm lo ve.

Kum zabi 19-na aṭang daih tawh khan heng inkah rimtuina, perfume kan tih maiho hi an lo siam chhuak daih tawh mai a, rin ai tak chuan a lo rei viau tawh a ni. Mesopotamia leh hmanlai Pharoah hunlai daih tawh khan Egypt-a mi hausa leh challang deuh te chuan inhnawih rimtui nan an lo hmang tawh ṭhin a, heng hunlaiah erawh hi chuan tunlai anga inkah rimtui perfume kan tih ang em hi chu a la ni lo. Pangpar chi khat, densawma sawra a tuia kha inhnawih theih tura siam te a ni tlangpui ṭhin. A hnu kum rei vak loah chuan Roman te leh Persian lam ten heng aia changtlung zawk hian an siamchhuak ta a, a rim engtiangin nge a nam rei ang a, a ṭhat rei dan turte leh a rim reh lova vawn reng dan turte zir chiangin an tichangtlung chho ta zel a ni. Hriat theih china mimal perfume siam chhuaktu hmasa ber chu Tapputi BC 2-na hunlai daih tawh thil hlui an laihchhuahna aṭanga an hmuh danin a siamna hmun leh bel eng ilo an laih chhuah zinga lung inker aṭanga hriat chhuah a ni a, kum 2004 chhoah khan thil hlui laichhuaktu ten Pyrgos, Cyprus-ah chuan kum 4000 dawn lai maia upa perfume (hriat theih chinah chuan a upa ber a ni hial awm e) chu an laichhuak a, pangpar mai ni lo, hnim bawlhlo leh hnimhnah rimtui aṭangtein an lo siam chhuak ṭhin a ni.

Tunlai thiamna hmanga perfume siam chhuah dan, a thlawr a thlawr kalhmang ang chi hi Arab mi, perfume siamtu Al kindi chuan Book of the Chemistry and Perfume and Distillation tih, kum zabi 9-na laia a ziahah chuan perfume siam chhuah dan chi hrang hrang 100 chuang dawn lai mai leh hnimhnah chawhpawlh dan tur chi hrang 107 chuang a lo ziak daih tawh nghe nghe a ni. Tihchangtlunin a awm chho ta zel a, Rome khawpui-ah te a siamna Factory-din a nih hnuah phei chuan perfume siamtu lamin ṭan lain thawmhnaw siam chhuaktu lamin thawmhnaw mai ni lo, anmahni hming chawia perfume siamchhuah duhna nen inremsiamna ṭha leh felfai zawk siamin designers perfume te an lo siam chhuak ta zel a ni. Chung zinga khawvelin a ngaihhlut zual leh hlui thei lo, vawiin thlenga hralh la kal zualte chu Chanel No. 5, Designers Coco Chanel hming chawia siam, rose leh jasmine chawhpawlh a siam chhuah, khawvela perfume man to berte zinga mi te leh, hmeichhe lam perfume bikah Chloe, Gucci siam Guilty-te, Ralph Lauren kutchhuak Romance-te, Bvlgari for women Bvlgari siamchhuah tho te, pheikhawk siamchhuaktu hmingthang Jimmy choo-te, DKNY be delicious-te, Juicy Couture leh Calvin Klein Obsession-te ho hi hmeichhe lam perfume-ah chuan mite ngainat leh ngaihhlut zualte an ni.

High-end designer ni lo ho zinga ha leh a man pawh mi nawlpui tana lei harsa lo chu Guess Seductive I’m Yours-te, Nine West Love Fury, M-Luscious Pink Mariah Carry-te leh Baby Phat Seductive Goddes, Kimora Lee Simmons siam chhuah te hi kumin chhunga hralh kal tur leh mite ngaihhlut tura mithiam tena an beisei a ni. Kan tlangval lam ve thung aw, in lo rimtui ve lo palh ang e. Paco Rabanne One Million-te, Hugo Boss siamchhuah Boss Bottled te, Jean Paul Gaultier Le Male, Armani Code Giorgio Armani siam chhuahte, Issey Miyake L’eau D’Issey pour Homme, Dolce and Gabbana The One for Men leh Ralph Lauren Polo Red-te ho hi mipa lam tan chuan perfume ṭha leh hlui thei lote an ni. Lo bel chiang la i duh duh ilo thlang ve tawh mai dawn nia. Online Shopping tam zawkah chah mai theih turin a awm deuh vek a ni.

(Eau de Toilette - 10% perfume concentration a ni a, vun ti-fresh-tu ang a ni ber. Inbual zawhah taksaa kah chi a ni. Alcohol content a sang hle. Nipui laiin an hmang nasa.

Eau de Colgne - Germany-a Colgne khua aṭanga siam chhuah rimtui a ni. Germany pawnah chuan Chypre citrus perfume sawi nana hman a ni. 7% perfume concentration a ni. A rim a rei lo tlangpui.

Eau de Perfum - Perfume (oil) concentration a sang a, 15% emaw, a chung lam emaw a ni ṭhin. Thuamhnaw leh sama kah chi a ni tlangpui. A man a tlawm tlangpui a, a rim pawh a kai rei)

Tluangpui Hmar, Instructress
Vakiria Institute of Fashion Technology