Nipui film turte

Khawthlang rama an hun nghahhlelh chu nipui a ni a, a chhan chu movie a chhuah ṭhat ṭhin vang a ni. Nipui vanglaia movie ṭha en hi an chîng hle a, kar tawp hun an hman liam dan langsar tak a ni.

Tun nipui chhunga movie chhuak tur hi en a chakawm hlawm khawp mai. May 1 hian Avengers: Age of Ultron a chhuak ang a, he film hi dollar maktaduai za chuang fe lalut thei tura ngaih a ni. Hei mai hi a ni lo, chanchin ngah 'Ant-Man' hi July 17 hian tihchhuah a ni ang a, The Fantastic Four chu August 7-ah tihchhuah a ni bawk ang. Hengte hi movie lianzual an ni. Superhero ni lem loah chuan Terminator Genisys hi July 1 hian an tichhuak ang a, Arnold-a kan hmu leh ang.

Action movie-ah hian June 26-a tihchhuah tur Big Game te, July 31-a tihchhuah tur Mission: Impossible Rogue Nation, August 21-a chhuak tur Criminal leh August 28-a chhuak tur Hitman: Agent 47 hi nghahhlelhawm tak, hmuhnawm tak tur vek an ni.

Animation lamah chuan hmuh chakawm em em chu July 10-a tihchhuah tur, Despicable Me aṭanga khawvelin cartoon character a lawm em em, 'Minions' hi a ni. A trailer ringawt pawh entu an tam a, Minions ho chanchin, hruaitu hrang hrang an neih tawh, anmahnin tihpalhah an tihhlum zel chanchin, New York khawpui thlenga an pem thlak dan chanchin a ni.