Ṭhazual Awards Best Female Artist an âwm

A ṭha ber thlan turah chuan thlan a harsa ve ang. Lengzem huang chhunga Best Female Artist tur hian kan hmeichhe zaithiamte an ṭha hlawm a ni. Ṭhazual Awards-a Samsung 3:16 Plan Solution Best Female Artist-ah hian DJ Lalvenhimi 'Liam Mai Rawh' a awm a, Pantei 'Zai Rimawi', Famkimi Kawlni 'Nghilh Zai Rel Ang', Feli Fanai 'Ṭhen Che Ka Hlau' tih leh Lawmi Khiangte 'Kumtluang Atan' tihte a awm.

DJ Lalvenhimi hi a buk rit ber pawl a ni a, tunlai Mizorama lengzem huang chhunga hmeichhia kan neih ṭhatte zinga mi a ni. 'Liam Mai Rawh' hla hi a hit hle a, Ṭhazual Chart-a top 10-a vawi khat lannaah pathumnaa lang nghal thei kha a ni. He hla hi nikum chhung khan Ṭhazual chart-ah hian vawi 12 ngawt a lang a, pakhatna vawi li hauhin pahnihnaah vawi hnih leh pathumnaah vawi li a awm thei. Nikum chhung khan DJ hla dang, Inṭhen Long tih chu chart-ah hian vawi sarih ngawt a lang bawk a, he hla hi nikum hmasaa chhuak kha a ni.

Pantei hi a hit em em reng a, kum 2014 chhunga Ṭhazual Lengzem chart-a pakhatna hauh hmasa ber kha a ni. A hla 'Zai rimawi' hi chart-ah vawi 12 ngawt a lang bawk a, vawi nga ngawt chu pakhatna a hauh a, pahnihnaah vawi hnih awmin, pathumnaah vawi hnih a awm bawk. A rualin, Pantei hian, chart-ah hla pahnih lang kawp thei nikum khan a nei a, a hla pakhat Lehkhathawn chu chart-ah vawi thum ngawt a lang hman a, nikum hmasa nen chuan he hla pawh hi a hlawhtling hle.

Music video a la ngah lo nachungin a neih chhunte erawh a hlawhtling thei hle. Famkimi Kawlni hi music video a la neih tlem ang hua en chi a ni lo. A music video hmasa pawh kha pakhatnaah a awm thei a ni. Tuna Samsung 3:16 Plan Solution Best Female Artist-a a lanna hla 'Nghilh zai rel ang' tih hi nikum chhung khan Ṭhazual chart-ah vawi ruk a lang a, pakhatna vawi hnih ngawt a hauh a, pahnihna leh pathumna vawi khat ve ve a hauh bawk.

Mipuiin an lawm leh an star, Feli Fanai hi hmeichhe zaithiam zingah chuan a huphurhawm pawl a ni ngei ang. 'Ṭhen che ka hlau' tih hi nikum khan Ṭhazual chart-ah hian vawi nga a lang a, pakhatna hauh pah em si loah chuan hla hit ber pawl a tling. Pahnihnaah vawi khat a awm a, palina, parukna, pasarihna leh pariatnate a hauh tawh a ni. Feli Fanai video 'Chhan loh hmangaihna' chu nikum khan a hit pawl a ni tho bawk.

Mizo Idol-a a vanglai ang reng la ni thei Lawmi Khiangte hi a ri hluai lo nain, a kal dan a constant a, a fei khawp mai. 'Kumtluang atan' hla aṭang hian thawm hit ropui tak nei hluai lo mah se, Zo rimawi khawvelah chuan a buk rit ber pawl a nihzia a lang.Pakhatna hauh em lo mah se, a feizia lanna chu Ṭhazual chart-ah vawi 11 ngawt a lang a ni. Pahnihna,, pathumna, palina, pangana leh paruknaah te a kual nasa hle.