Mithun Chakraborty hnenah Dadasaheb Phalke Award

Veteran Bollywood actor, Mizote pawhin kan hriat lar, Mithun Chakraborty chu cinema lama chawimawina sang, Dadasaheb Phalke Award hlan a ni dawn.

Union minister Ashwini Vaishnaw chuan nimin khan Mithun hnena chawimawina sang hlan a nih tur thu hi a puang a ni. October 7,2024-a 70th National Film Awards ceremony-ah hlan a ni ang. Kum 74 mi ni tawh, Mithun Chakraborty hian Bollywood a luhchilh hnuah a film hmasa ber, Mrigayaa chu kum 1976-ah a chhuak a, he film aṭang hian National Film Award-ah Best Actor a la zui nghal a ni. Kum 1982-a a film, 'Disco Dancer' avangin ram pum huapin a lar chho a, box office lamah pawh a hlawhtlinpui hle. He film-a hla, "I Am a Disco Dancer" leh "Jimmy Jimmy" a dance performance chu a larpui hle a ni. Hei bakah 1990-a chhuak, Angeepath film pawhin fak a hlawh hle bawk. "Kasam Paida Karne Wale Ki” leh “Commando” ahte a chang bawk a, heng bakah reality show lamah pawh judge-ah a ṭang fo a ni.

Dadasaheb Phalke Award hi India-in cinema lama chawimawina a pek sang ber niin, kum tinin National Film Awards ceremony-ah hlan an ni ṭhin. He award hi father of Indian cinema tia sawi ṭhin, Dadasaheb Phalke chawimawina atan a hming puttir a ni. Phalke hian kum 1913 khan India feature film hmasa ber, Raja Harishchandra a siam a ni. Chakraborty hi Dadasaheb Phalke Award dawng thei 54-na a ni ang.