Fashion Fiesta Celebrities Fashion Lines

Milar tam tak hian an lar hnuah an hmingthanna chu hmang ṭangkaiin fashion line an nei hlawm a, an hlawk viau zel. Ṭhenkhat phei chuan fashion hi an sum hmuhna lian berah an hmang chho zui a, an hlawhtlinpui viau ṭhin a ni. Fashion industry aṭangin heng milarte hian an fashion design aṭangin sum tam tak an la lut. Tun ṭumah chuan heng milar, fashion lama kaltate zingah an thawmhnaw siam hralh chhuah aṭangin tuten nge sum lalut hnem a, an fashion line hi tuten nge hlawkpui ber tih kan thai ve thung.

Celeb Fashion line sawi tawha sawi lan loh theih loh chu Ashley leh Mary Kate Olsen te unau hi an ni. An naupan lai aṭang tawhin film lama hming lo chher tawh an ni a, kum 2006 aṭang khan fashion line an nei ṭan a ni. Fashion line pathum, hlawhtling tak tak an nei a, Olsenboye hi naupang lam hak chi a ni a, Elizabeth and James leh The Row te a ni. The Row hi high-end fashion a nih angin a man pawh a to ṭhin hle. An backpack pakhat chu USD 18,000 zet man a ni a, Jessica Biel pawhin a lei kha. Tunah hian he fashion line hian USD tluklehdingawn 1 vel zet sum a lalut tawh.

America's Next Top Model-ah pawh judge lo ni tawh, actress Kimora Lee Simmons hi fashion line hlawhtling ber neite zinga mi a ni. Russell Simmons-a nupui hlui hian fashion line pathum - KLS, Kouture by Kimora leh Fabulosity a nei a, heng a fashion line aṭanga thuamhnaw a hralh chhuah zawng zawng hi kum khatah USD mtd 800 zet a tling. A hmain Baby Phat a nei ṭhin bawk a, a pasal ṭhin, Russell Simmons nen an inneih lai khan Phat Farm hi USD mtd 140-in an hralh.

Fashion's Billion Dollar Baby ti hiala an koh Jessica Simpson hi milar, fashion line nei zinga hlawhtling ber a ni. A thawmhnaw leh a chhehvel, kum khata a hralh chhuah zawng zawng zat hi USD mtd 750 zet a ni. Jessica Simpson Collection-ah hian handbag, pheikhawk leh thawmhnaw chi hrang hrangte a tel. He zaithiam hian a collection hi kum 2006 aṭanga a ṭan kha a ni.

Music mogul, rapper hlawhtling Jay-Z hi music chauh ni loin fashion khawvelah pawh a hlawhtling hle. Kum 1999 aṭang khan Jay-Z collection, Rocawear a tichhuak ṭan a, tun thlengin collection hlawhtling ber zinga mi a ni. Urban lifestyle lam a uar a, boasting clothing, handbag, lukhum, kawnghren, tlereuh, mit cheina leh pheikhawk te thlengin a tichhuak a ni. A thawmhnaw behbawm hralh zat hi kum khat USD mtd 700 laite a tling.

Rap khawvel aṭanga kan hriat lar bawk, Sean P. Diddy Comb hi fashion-ah pawh a hlawhtling. A clothing line, Sean John hi kum 1998 daih tawha a din kha a ni a, tun thlengin a la hlawhtling. Kum 2000 khan Council of Fashion Designers of America (CFDA) chuan mipa inbel chi thuamhnaw lama chawimawina, Menswear Designer lawmman dawng thei tur a chhawpchhuah zingah a tel a, kum 2004 khan a dawng ta hial a ni. Kum khat chhung a thil hralh chhuah zawng zawng hi USD mtd 250 hu zet a ni.

Victoria Beckham hi tunlai khawvelah chuan fashion line-a lar berte zinga mi a ni. Kum 2004 khan VB Rocks fashion line chu a tichhuak ṭan a, mahse hei hi limited edition a ni a, jeans lam niin, high end fashion a ni. Hemi hnu hian fashion kaihhnawih thilah a tel a tel a, kum 2007 khan dvb Denim a tichhuak a, kum 2008 aṭang khan ama hmingin a ti tak tak ṭan. Kum 2011 khan Victoria Beckham label a nei ṭan a, hemi kum hian Designer of the Year-a thlan a ni. Thawmhnaw man to mai bakah handbag te a tichhuak a, kum khat chhunga a hralh chhuah zawng zawng hi USD mtd 600 vel a ni.

Gwen Stefani hi No Doubt-a a awm lai aṭang tawhin fashion design hi a tuipui tawh a, stage-a a thawm≠hnaw inbel ṭhinte kha ama kutchhuak a ni. Kum 2004 aṭang khan L.A.M.B. fashion line a nei
ṭan a, a hlawhtling chho hle. Guatemalan, Japanese leh Jaimaican style aṭangin thuamhnaw a siam ṭhin a, a hlawhtling hle. Underwear te, naupang thuamhnawte pawh a tichhuak a, tunah hian kum khatah USD 90 man vel a hralh chhuak ṭhin.

Khing mite bakah khian Justin Timberlake te, Rachel Zoe, Nicole Richie leh midang tam tak hlawhtling tak tak an awm nual mai. Tun atan chuan heti chin hi duh tawk ila. Nangmaha idea ṭha tak kha i hman thiam a, i taimak phawt chuan fashion line hlawhtling tak i la siam ve thei a ni.