Universe dangah Zayn hi 1D member a la ni thei : Stephen Hawking

Van boruak chanchin zir mi leh mithiam, Stephen Hawking chuan One Direction fan te tana thu lawmawm sawiin, One Direction aṭanga bang ta, Zayn Malik chu band member a la nih theih thu a sawi.

Sydney Opera House-a lecture a peknaah, khawvel puma tleirawlte rilru tinatu, Zayn-a’n 1D a chhuahsan chhanah cosmological effect a awm leh awm loh chung­chang zawh a ni a, Stephen chuan he zawhna hi fiamthua chhangin, “Tleirawl rilru nate hnen­a ka thuchah duh chu theo­retical physics zirna an ngaihpawimawh a ṭul a, eng tik niah emaw chuan ka chenna universe ni lo hi universe dang a la awm tih kan hmuchhuak thei a, kan chenna lei leh van boruak piah lama universe dang a awm leh mai thei tih hi thil theih loh tawp a ni lo. Chu universe-ah chuan Zayn-a hi One Direction-ah a la awm reng a ni,” a ti.

“Tleirawl rilru nate’n an hriat duh tâkin, he universe dangah hian Zayn-a nen nupa hlim tak an ni thei bawk,” tia fiamthuin Stephen chuan a sawi zui.