Chetan Bhagat-a’n Preity Zinta a ràl ngaihzawn

A lehkhabu ziah avanga India mipuite hriatthlawh Chetan Bhagat chuan Star Plus television show, Nach Baliye-a a co-judge leh Bollywood lemchanthiam, Preity Zinta chu college an kal lai aṭanga a star ṭhin thu a sawi.

‘2 States’ lehkhabu ziaktu Bhagat chuan a lehkhabu ziaha hmeichhe character-ah Preity Zinta-in nasa taka nghawng a neih thu a sawi bawk a, Nach Baliye television show-a a a bula a ṭhu thei chu lawmawm a tih thu a sawi bawk.

“A kianga ka awm thei chu ka lawm a, ‘Dil Se’ film a chan aṭangin ka lo ral ngaihzawn tawh a ni. Khatih lai kha chuan ama anga hmeichhe lemchanthiam an awm lo a, ka lehkhabu ziaha hmeichhe character ka siamah Preity hian a influence nasa hle a, ka thawnthu ziaha hmeichhiate nunchang chu Preity anga ṭawng duh, huaisen leh hlim thei tak an ni,” tiin Bhagat chuan a sawi.

“Ṭawng a duh avang­in reality dance show, Nach Baliye-ah judge ṭha tak a nih phah a, a chang chuan contestant te lakah a dawhthei mah mah niin ka hre ṭhin,” a ti.

Kum 41 Bhagat chuan eng vanga reality dance show-a judge ni nge a nih tia an zawhna chu chhangin, “Ka tan chuan he thil hi a ṭangkai a, India leh rampawna issue hrang hrangah ngaihdan ka nei a, chu ka ngaihdan chu a tam thei ang berin hria se ka duh a, ka lehkhabu ziah leh ka column chhiar ngai lote hmaah he show aṭang hian ka inlan thei dawn a ni. Nach Baliye-a min hmuh aṭangin ka lehkhabu ziah pawh min la hre lote’n chhiar an chak phah thei a, miin ka aw (voice) hi hria se ka duh a ni. A bak chu television-a lan chakna ka nei lo,” tiin a sawi.