Universal Music-in Bob Dylan-a song catalog zawng zawng an lei

Universal Music Publishing Group chuan music legend Bob Dylan-a song catalog zawng zawng an leisak a, mi ṭhenkhat chuan hei hi khawvela music publishing inremna siam tawha la pawimawh berah an ngai hial.

Bob Dylan tunge a nih kan hria a, a sulhnu hnutchhiah ropui zia chu rimawi lam tui mite chuan an hmuh hmaih thiang lo a ni tawh. Chung a sulhnu ropui tak tak zinga ropui lehzual Blowin In The Wind, The Times They Are a-Changin, Like A Rolling Stone, Lay Lady Lay, leh Forever Young-te pawh Universal Music nena an inremna siamah hian a tel niin Universal Music chuan thuchhuah an siamah an tarlang a, kum 60 liam ta chhung vela Bob Dylan-a hla ṭha tak tak 600 chuang copyright chu an kutah a awm ta tih an tarlang a ni.

Music company hian an inrem­na chungchang hi tarlang mah se cheng engzat hu nge Dylan hi inremna an siampui a tarlang lo a, mahse $maktaduai 300 hu tal chu niin The New York Times chuan an chhut.

Rimawi khawvela mi ropui Dylan hian 1960 chho aṭang khan khawvel pumah a record maktaduai 125 chuang a hralh tawh a, kum 2016 khan Nobel Prize for Literature hial lo dawng tawhin a hlate hi khawvela zaithiam lar ber ber pawhin an cover hnem tawh hle a ni.