Christopher Nolan-a'n Warner Bros a sel "HBO Max hi streaming service chhe ber a ni!"

"Kan industry-a film siamtu lian ber ber leh movie star pawimawh tak takte chuan khawvela film studio ṭha ber tan an thawk nia ngaiin zan mu an chhing a, zing an han tho erawh chuan khawvela streaming service chhe ber an thawhpui tih an hre chhuak leh si," tiin Christopher Nolan chuan December 3-a Warner Brothers thutlukna chu na taka a dem thu a sawi.

"Warner Bros. hian theatre a ni emaw ina en turin a ni emaw film siamtute tan ṭha takin an thawk ṭhin a, mahse chu chu kan sawi mek lai hian tihtawpin a awm a ni. Eng nge an hloh tih pawh an hrethiam lo. An thutlukna hian economic-ah awmzia a nei lo a, chu chu Wall Street investor casual ber pawhin a danglamna a hrethiam ang," tiin khawthlang media liante hmaah a sawi.

Khawvela film director ropui ber zinga mi, Warner Bros. ṭum eng emaw zat lo thawhpui tawhtu hi a thawhpui ṭhin studio lakah hian a lawm lo hle a ni. Warner Bros hian December 3 khan thuchhuah siamin an film lian tak tak 17, nakkum lama tihchhuah an tum chu HBO Max-ah an pe chhuak dawn tih an puang.

Heng zingah hian The Matrix 4, The Suicide Squad, Godzilla v. Kong, Dune leh In the Heights-te pawh a tel.