HL Biakmawia (Bma) MV thar tlangzarh

Mizo mipa zaithiam lar chuai thei lo, aw pa dangdai tak nei, HL Biakmawia (BMa) hla thar, zu leh drugs dona hla, 'Tlansan rawh' tih chu nimin, October 1, 2023 khan Mount Carmel School principal, Lalnunkunga'n a tlangzarh.

'Tlansan rawh' tih hi Bma phuah a ni a, Mizorama ruihhlo tam lutuk chu a veina a rei tawh a,zan khat chu mu thei loin a ngaihuah a, he hla hi a phuah ta a, a hun takah Pathianin a phuah tir ta niin a sawi. Ruihhlo ngai leh, ruihhlo ti thar an pung zel chu a veiin a rilru a khawih a, thu ringawt chuan an rilru a thleng pha tawh lo a, hla hmanga au chhuah hian awmzia a nei deuh ang tiin he hla hi a siam tih Vanglaini a hrilh. Ruihhlo dona kawnga ṭan tlanna turin a hla hi YouTuber ho pawh a thlawna a pek vek tur thu a sawi bawk. Recording leh music video siamna tura senso hi Mount Carmel School principal hian a tumsak vek a ni.