iphone 12: India rama an zawrhna man zat tur a hriat theih ta

Apple chuan an mobile phone thar ber iphone 12 variant hrang hrang chu India ramah engzatin nge an zawrh chhuah dawn a chiang tawh a, Mizo zingah pawh lei tum sa ran an awm leh nual tawhin a rinawm a, variant ṭhenkhat phei chu naktuk, Zirtawpni aṭang hian a pre-order theih tawh dawn nghe nghe a ni. Camera chu a ṭha leh hlawm hle dawn tih a chiang sa a, a man erawh a sang leh ṭalh ṭalh hlawm hle. Variant hrang hrangah hian iPhone hmasa ho ang bawkin storage hrang hrang thlan tur a awm leh a, 64GB aṭanga 512 GB thlengte pawhin a awm a ni.

'Standard' iPhone 12 hi phone leina atana nuai chuang hman hreh si, screen hlai ṭha ve pangngai hmang duhte tan chuan a ṭha hle ang. iPhone 11 ang bawk khan 6.1 inch display a ni a, iPhone 4 ang deuh khan flat-edge design niin OLED screen a hmang dawn bawk. Apple A14 processor thar a hmang a, 5G a support bawk a, rawng chi hrang panga thlan tur a awm a, wireless charging system a hmang dawn bawk.

October 23 aṭangin a pre-order theih dawn a, Rs 79,900 aṭangin a inṭan ang.

Apple hian iPhone compact tak an tihchhuah ṭhin ang khan iPhone 12-ah hian an rawn siam leh ta a, iPhone 12 Mini hi 5.4-inch chiah a ni a, phone lian ngaina lo tan chuan a ṭha leh hle dawn tih a chiang a, ngainatu pawh an tam leh hle mai thei. A tet avang hian iai chi erawh a ni hauh lo a, Super Retina Display HDR10 a hmang dawn a, Apple A14 processor, 5G connectivity leh  flat-edge look design hmang a ni. 

November 6 aṭangin pre-order theih dawn a, Rs 69,900 aṭangin a inṭan dawn a ni.

iPhone 12 Pro hi iPhone 12 zingah chuan a man to ber dawttu a ni a, multitasker, content creator leh professional photographer-te tan pawh ṭha hle tura ngaih a ni. iPhone 12 dang nen a design a inang a, 6.1 inch display neiin  'standard' iPhone 12 nena a danglamna langsar ber chu camera front a ni a, Pro model-ah hian camera pathum awmin LiDAR scanner a awm bawk a, hei hi low light condition-a autofocus chak zawk tura ngaih a ni. Dolby Vision HDR video 60fps thleng a la thei bawk.

India ramah chuan October 23 aṭangin a pre-order theih a, Rs 119,900 aṭangin a inṭan dawn.

Kumina iPhone chhuak thar zinga man to ber leh hlai ber chu  iPhone 12 Pro Max hi a ni a, 6.7-inch OLED screen a hmang a ni. Phone hman lai i hmang hreh lo a nih chuan iPhone 12 Pro Max aia phone ṭha hi i tan a awm chuang lo ang. iPhone 12 top end phone hi   iPhone 12 Pro nen camera chu a inang a, mahse wide-angle lens Pro version ai khan Apple chuan sensor an hmang lian zawk. 

November 6 aṭangin pre-order theih dawn a, Rs 129,900 man vel aṭangin a inṭan dawn thung.