Vawiin aṭangin Champhaiah Hnahsin Kût
Champhai Nature Conser-vancy huaihawtin Mizorama Hnahsin Kût hmasa ber chu vawiin, October 3, 2024 aṭangin Champhai phaizawlah neih a ni dawn a, October 18 thleng a awh ang.
Vawiin chawhnu dar 3:30-ah Kût hawnna inkhawm hi Aui Garden, New Champhaiah neiin, khuallian TBC Lalvenchhunga MLA, Adviser to CM chuan Kût hi a hawng ang. He hun hi Champhai South MLA Clement Lalhmingthanga leh Champhai North MLA Er. Ginzalala ten an hmanpui dawn a ni.
Zaninah opening concert a awm nghal dawn a, Saiwanah Sailo, Ruatfeli (Triau Trackx), Mangheta Chinzah, Chhaktiang Rimawi, Vanlalduhawma, RihnimXsession, Zolentute Band, Drac Frost, The Skyfall leh 2 Braz Band te an che dawn.
Hnahsin Kût neih chhung hian phai zawlah event hrang hrang buatsaih a ni dawn. October 4-ah phai phei kawngpuiah fashion & dance show buatsaihin Nunui Rualhleng, Thanthani Tuallawt, Lily Darnei, Muansangi Varte, Rinhlui, Rinzuala, Timothy Vangchhia, Kima Hmar leh C Funk te an inlan dawn a ni.
October 5 hian Cycle rally, Tour de Champhai, leh Costume and Cosplay Day hman a nih bakah concert buatsaih a ni ang a, Mary Dawngi, Rebecca Lallawmsangi, Lil Kiki leh Mendal te an inlan ang. Zan lamah Aui Garden-ah Marina Varte, Thangromawia Thomte leh Sumeon Khiangte te hoin Leikapui zan hman a ni dawn bawk.
Hnahsin Kût kharna hi October 18, 2024 zanah Mualnuamah Arkaiden zan concert hmangin neih a ni dawn a, he hunah hian Youngfella, K.Hminga, Mood Station leh Triau Trackx te an che dawn a ni.
October 3-5, 2024 chhung hian phai pheiah kids' carnival buatsaih a ni dawn a, Aui Garden-ah photography exhibition neiin, October 3-18 chhungin Beram Tlangah paragliding neih a ni bawk ang. Kut neihna hmunah hian stall siamin, food court-te buatsaih a ni bawk. Stall te hi Kût tawp ni, October 18 thleng hawn an ni ang.
Champhai Nature Conservancy chuan Hnahsin Kût hi eco tourism promote-na tura a buatsaih niin, eco-friendly thei ang bera kalpui an tum. Hemi atan hian kut hmanna tura an hmanrua sak leh siam hrang hrang pawh ṭawih thei lo, plastic lam lang lo thei ang berin an siam a, hei hi mipuite zirtirna ni pah turin an duh bawk.