Mi 100 chuangin Sean 'Diddy' Combs khin an tum

Rapper Sean 'Diddy' Combs chu mi 100 chuangin mipat hmeichhiatna lama khawih leh pawngsual kaihhnawihah khin an tum tih US lawyer Tony Buzbee chuan a sawi.

Combs hi sex trafficking chungchangah man a ni tawh a, thubuai rip tak a nei mek a ni. Bail a dilna chu hnawlsak a nih vangin federal custody-ah a awm mek. Diddy chuan an puhna hrang hrangte chu thu dik lo niin a sawi ve thung. Hetih lai hian Texas-based lawyer, Buzbee chuan Combs chet dan dik lo sawi chhuak an pung zel a, rawn ṭawng chhuak zinga ṭhenkhat chuan mipat hmeichhiat lam hawia mawi lo taka khawih an nih lai hian kum 9 mi chauh te an ni tih an sawi niin a tarlang. Hengte hi uluk taka an chhui zui tur thu a sawi. Mahse Comb-a lawyer, Erica Wolff chuan Combs hian an puhna te hi thu dik lo leh belhchian dawl lo tih sawiin, court-ah ngei finfiahna rintlak tak hmanga thu dik lantir thuai pawh a nghakhlel tawh hle tiin a sawi ve thung.