Zaninah 'Pu Nunga Colony' chhuak dawn

In-House Production buatsaih film pasarihna, 'Pu Nunga Colony' chu zanin dar 8:00 hian Vanapa Hall-ah chhuah ṭan a ni dawn a, a hmuna en duh tan ticket Rs 100 man siam a ni.

Director chu Drew Pachuau a ni leh a, tun hma aṭanga a chet fuh pui ṭhin Papuia Pachuau leh Sangsangi an inlan leh dawn. Rosangpuii (Rsp-i), Tommy, Francis Malsawma te en an chakawm a, mi hriat hlawh Fela Ralte (Rala Kone) a tel dawn bawk.

In-House movie dang ang bawkin Samuel Pachuau chu script ziaktu a ni leh a, tun ṭumah hian Thingtlang Nula changtunu Vanlallawmawmi leh Mary Chawngthu te an inlan tel bawk avangin a phurawm zual.

Drew Pachuau chuan, "Movie kan siam ve tawh zingah chuan sum kan hman tam berna a ni a, kan budget pawh nuai 15 a tling. Theihtawp kan chhuah a, chuvangin kan beisei pawh a sang hle," tiin kumin June thla aṭanga an buaipui, Pu Nunga Colony a thil thleng chungchang, buaina leh zawhna tam tak lo chhuak an lantirna movie thar hi mi tinin an hlut a beisei thu Vanglaini a hrilh.

'Pu Nunga Colony' hi Series a ni dawn, series paliah ṭhenin series pakhat hi darkar khat zel a ni ang. Lersia Play-ah lei theih a ni dawn a, Rs 299 aṭangin a man hi a inṭan.

In-House hian tun hmain movie hrang hrang - Ka Bialnu, Driver Kima, Brother Zova, Pa Hausa, Rini leh Rina leh Kan Chhungkua te an lo siam tawh a, tunah Pu Nunga Colony an ti chhuak leh dawn chiah a ni. Movie an siam tawh zingah 'Pa Hausa' chu mi lawm hlawh leh sum an lakluh tamna ber a ni.