Post Malone-in nomination a hmu hnem ber
2020 Billboard Music Awards Nomination chu Thawhlehni khan puan a ni a, 'Sunflower' hitmaker Post Malone chuan nomination hmu hnem berin 16 ngawt a hmu. Post Malone tih loah chuan Lil Nax X-in hmu hnem berin 13 a hmu a, Khalid leh Billie Eilish-te chuan 12 ve ve an hmu bawk.
Kumin Billboard Music Awards-ah hian Garth Brooks chuan nikuma Mariah Carey kuta an hlan Icon Award a dawng dawn a, nikum leh kum hmasa lama lo host tawhtu Kelly Clarkson bawkin a host leh dawn.
Hripui chu leng lo se April 29 khan award semna ceremony hi buatsaih tumin ruahmanna an siam vek tawh a, mahse tikhawtlai lehin October 14 hian Dolby Theatre, Los Angeles, California-ah award semna ceremony hi an buatsaih dawn a; NBC chuan live-in a broadcast dawn a ni.
Gospel artist huangah Kanye West a langsar
Rapper Kanye West chuan Gospel category-ah nomination eng emaw zat a hmu a, chung zingah chuan Top Christian Artist, Top Gospel Artist, Top Gospel Song leh Top Christian Song category te pawh a tel.
Heng category hrang hrangah hian Kirk Franklin, Lauren Daigle leh Hillsong United-te nen an inel dawn a ni.
Category ngaihnawm tur Top Artist leh Top Billboard 200 Artist
Top Artist-ah hian Billie Eilish, Jonas Brothers, Khalid, Post Malone leh Taylor Swift-te an awm a, he category-a hming langte hi an langsar hlawm ṭhe ṭhaw bawka awardee ber tur hriat a chakawm tawh hle.
Top Billboard 200 Artist-ah pawh hian Billboard chart lama che ṭha tak tak leh record hrang hrang siam thei Drake, Billie Eilish, Khalid, Post Malone leh Taylor Swift-te dahkhawm a ni bawk a, he category pawh hian ngaihven a hlawh hlein a rinawm.