Lersia Play: September-a entu ngah ber 'Lerlawri'

September thlaa Lersia Play aṭanga Mizo film pek chhuah zingah 'Lerlawri' chu hralh chhuah tam ber niin, entu a ngah ber.

'Lerlawri' hi September 13, 2024-a tlangzarh a ni a, Zote Entertainment kut chhuak niin director hi Mike a ni a, director of photography chu Biaka St. Phography niin Lersia Play hi co-producer a ni bawk. He film-ah hian Mizo hmeichhe lemchan thiam kan neih ṭhat, Ruthy Chenkual channa a ni a, Hriatpuia Kion, Joel Pachuau, Machhungi, Partei (lerlawri tia hriat lar) leh VL Hmuaka te an chang bawk. Nula leh tlangval inhmangaihna zinkawng, an chhungte ve ve aṭanga buaina an tawh dan, hlimawm leh lungchhiatthlak takte a ni.

Lalnunsiama (SVP) kut chhuak, 'Million Dollar Boy' chu No 2 niin, he film hi thil thleng tak tak behchhana siam a ni. Director of photography hi Lenry Renthlei niin, script writer David Lalrinsanga a ni. Sangtea Chhangte chu a changtupa niin, Andrew Laltlankima pawh a changtu zingah a tel.

September thla chhung film hralh chhuah hnem pathumna chu 'Thangfenpa bawp' niin, Rinkson Squad siam a ni. Anni hi fiamthu film ti chhuak ṭhin an ni a, he film The Adventure of Lalnuna leh Lalmuana movie puitling hnuhnung ber tur a ni a, Mastea (Lalnuna) leh Bta (Lalmuana) bakah Hmunmawia(Lal pa hmuna), Vanlalpeki (Ring Gundai) leh Ramhluna (Officiala) te kan hmu leh a ni.

August 29-a tlangzarh, Mizo mi lar rual inlanna film, 'Ka nihna a ni lo' leh September 14-a tlangzarh, 'Sernung' chu Lersia Play-in September thlaa film a hralh chhuah tam zual panga zingah an lang pha bawk.

Mizo streaming app, Lersia Play hian mahni in lum aṭanga en theih turin Mizo film ṭhahnem tak min chhawpchhuah sak tawh a, film thar pawh a chhuak chak hle a ni. Lersia hian tun thla chhunga film tih chhuah tur hmabak pawh eng maw zat neiin, October 11-ah 'Bang leh lam', October 25-ah 'Nau Awih Hla' leh October 'Saii' tihte an pe chhuak leh dawn a ni.