Vulmawi Awards 2024 nomination ti chhuak

Vulmawi Awards 2024 chu December 6, 2024 zanah Saikuti Hall, Lungleiah neih a ni leh dawn ta. Nomination pawh tih chhuah ni tawhin, vawiin October 5, 2024 aṭangin Instagram, Facebook leh YouTube-a Vulmawi Awards 2024 tih ah vote theih a ni dawn a, October 20 thleng vote theih a ni ang.

Kumin hi Vulmawi Awards an neih kum kuana tur a ni a, C. Lalzarmawia chuan award pasarih dawng tawhin, award dawng tam ber a ni.Song composer, musician leh Song of the Year award a dawng vek tawh a ni.

Category hi 23 awmin, Gospel leh Lengzem/Lenglawng ah Best New Artiste, Best Male Artiste, Best Female Artiste, Best Music Video, Best Composer leh Song of the Year te siam a ni a, hei bakah hian Best Beat Group, Best Choir, Best Musician, Best Announcer, Writer of the Year, Sport Person of the Year (Male and Female), Entertainer of the Year, Best Rapper, Best Film leh Best Youtuber thlan an ni bawk ang.

Kuminah hian Rev. Dr. F. Sangvela hnenah Lifetime Achievement Award hlan a ni dawn a, footballer Lianzuala Chhangte chu Special Award hlan ani dawn bawk.