Black Widow nakkum May-ah!

Marvel Cinematic Universe (MCU) film The Falcon and the Winter Soldier, Black Widow, Eternals, leh Shang-Chi and the Legend of the Ten Rings-te chu tlangzarh hun an sawn hla leh. Coronavirus hripui leng vangin khawvel ram hrang hranga theatre tam tak hawn a la ni lo a, hei vang hian MCU calender chu her rem a ni leh ta a ni. 

The Falcon and the Winter Soldier tihchhuah hun tur sawn hlat a nih chungchang hi Disney+ chuan a tarlang hmasaa, he Marvel Series thar tur hi kumin chhunga tihchhuah hman tum mah se hripui lengin film industry-ah nghawng a la neih len chhunzawm zel avangin nakkum lamah an tichhuak dawn zawk tih an tarlang a ni.

MCU phase 4 hi WandaVision series chu kumin December hian an khuh hawng dawn a, mahse phase 4 movie hmasa ber tur Black Widow erawh kuminah kan en hman dawn ta lo a, nakkum May thlaah an tlangzarh dawn chauh.

Black Widow hi MCU film 24-na tur a ni tawh dawn a, kumin May thlaa tlangzarh tur khan ruahmanna an siam tawh zawk a, mahse hripui nasa taka a len avangin November 6 hian tlangzarh an tum leh a ni. Mahse vawiin thleng pawhin khawvela theatre tam tak khar a la ni a, hetiang film bugdet sang tlangzarh hi Marvel lam chuan an la ngam lo niin a lang a, thla ruk ngawta tawlh hla lehin nakkum May 7-ah an tlangzarh ang.

Nakkum February-a tlangzarh an tum Eternals pawh nakkum vek November-a tlangzarh an tum leh ta zawk a,  Shang-Chi and the Legend of the Ten Rings pawh thla hniha sawn hla lehin May 7, 2021-a tlangzarh an tum chu  July 9, 2021-ah an tlangzarh leh zawk si dawn a ni.

Heng MCU film-te hi tlangzarh hun an sawn ngun hlawm angreng hle a, hripui lengin ziaawm lam a pan thei lo a nih chuan hei ai pawh hian an la tawlh hla leh hlawm thut thei bawk.