LBS Suzuki Youth Icon: Zaninah Top 10 intihsiakna ṭan dawn

LBS Suzuki Youth Icon 2024 neih meka Top 10 thlan chhuahte chuan zanin, October 7, 2024 zan hian intihsiakna an ṭan dawn ta. Top 10 intihsiakna hi LPS Arena, Falkland-ah neiin, mipui chhim theihin buatsaih a ni tawh dawn. Ticket man hi Rs 50-a siam a ni.

Top 10 intihsiakna hi zan hnih neih a ni dawn a, zan khatnaah hian an hla thlan hmanga inelna neiin, October 8, 2024 zan hi CFL Hmingthanga night atan hman a ni dawn a, CFL-a hla hmangin an inel leh ang. Zanin aṭangin October 12 thleng zantin intihsiakna hi neih a ni dawn a, kar leh Thawhṭanni, October 14 zanah Top 5 result puan a ni ang.

Top 10-te hi Laldinhlua Champhai Kanan, Samson Lalhunruata Champhai Kanan, Lalbiakkima Hnamte Thentlang, Lalremsiami Darlawn Venghlun, Zion Tlaichhun Hnahlan, Ramengmawia Meiduk, Lalsangliana Bawktlang, J.Lalrosanga Tuidam, Peter Lalnunpuia College Veng leh Zothankima Tachhip te an ni. Top 10-ah hian hmeichhia pakhat chauh awmin, Aizawl mi pakhat chauh a awm bawk.

Zanina zai turte hian mentor an nei vek a, an mentor-te hian an hla thlan leh zir kawngah an buaipui a ni. Mentor atan hian Thangbawiha EME Records, Tluanga Hnamte Westend Studio, Kima Chhangte Homefree Music leh Peka Itis Home Studio-te ruat an ni.