Busan Film Festival-ah Raymond Colney leh Drew Pachuau

Asia-a film festival lian leh hriat hlawh, October 2 aṭanga neih ṭan, Busan International Film Festival 2024 chhim turin Mizoram aiawh tura thlan, Mizo film maker pahnih, Raymond Remlalmuana (Raymond Colney) leh Andrew Vanengmawia (Drew Pachuau) te an kal. He festival hian October 11 thleng a awh ang.

Busan International Film Festival-a tel tur hian India hmarchhak state tin aṭangin film maker pahnih ṭheuh thlan an ni a, Raymond leh Drew te hi Mizoram aiawh turin Information & Public Relations Department chuan a thlang a ni. An kalna senso zawng zawng hi Minsitry of Information & Broadcasting leh National Films Development Corporation (NFDC) in a tumsak vek dawn a ni.

He festival hi Korea rama international film festival neih hmasak ber niin, kum 1996 aṭang khan buatsaih ṭan a ni. Asia rama film maker leh director bul ṭan tirte pho chhuah chu an thil tum pakhat a ni.